傷心的人
《傷心的人》Siong-sim ê Lâng
蘇路Soo Lōo (蘇宥蓉Soo Iū-iông)
——————————————
我踮月臺恬恬看你
guá tiàm gua̍t-tâi tiām-tiām khuànn lí
看你離開我
khuànn lí lī-khui guá
雨水哪會滴滴答答
hōo-tsuí ná ē tih-tih-tah-tah
落甲遮爾大
lo̍h kah tsiah-nī tuā
心肝若親像是刀咧割
sim-kuann ná-tshin-tshiūnn sī to teh kuah
感情予人拆散
kám-tsîng hōo-lâng thiah-suànn
悲傷的人影
pi-siong ê lâng-iánn
一步一步行
tsi̍t-pōo-tsi̍t-pōo kiânn
無你的我
bô lí ê guá
強欲無性命
kiōng-beh bô sìnn-miā
冷冷的風
líng-líng ê hong
冷冷的雨
líng-líng ê hōo
冷冷的心
líng-líng ê sim
親像予針刺鑿我
tshin-tshiūnn hōo tsiam tshì-tsha̍k guá
滴滴答答
tih-tih-tah-tah
雨水按怎了解我心情
hōo-tsuí án-tsuánn liáu-kái guá sim-tsiânn
傷心的人雨中行
siong-sim ê lâng hōo-tiong kiânn
