今夜的月光
《今夜的月光》Kim-iā ê Gue̍h-kng
蘇路Soo Lōo(蘇宥蓉Soo Iū-iông)
——————————————
你看今夜的月光
lí khuànn kim-iā ê gue̍h-kng
溫溫頓頓照入門
un-un tùn-tùn tsiò ji̍p-mn̂g
一杯春茶搵脣
tsi̍t-pue tshun-tê ùn tshuì-tûn
毋知情路有偌長
m̄-tsai tsîng-lōo ū guā tn̂g
看著今夜的月光
khuànn-tio̍h kim-iā ê gue̍h-kng
歇佇寂寞的眠床
hioh tī tsi̍k-bo̍k ê bîn-tshn̂g
往事想來心會酸
óng-sū siūnn–lâi sim ē sng
憂愁留予啥人問
iu-tshiû lâu hōo siánn-lâng mn̄g
愛惜你我的緣份
ài-sioh lí guá ê iân-hūn
毋願開喙講怨恨
m̄-guān khui-tshuì kóng uàn-hūn
日來思念暝袂睏
ji̍t–lâi su-liām mî buē khùn
想來想去嘆心酸
siūnn-lâi-siūnn-khì thàn sim-sng
一段情路行無遠
tsi̍t-tuānn tsîng-lōo kiânn bô hn̄g
船過水面無留痕
tsûn kuè tsuí-bīn bô lâu hûn
煙花色彩鬧紛紛
ian-hue sik-tshái nāu hun-hun
有心也無人相問
ū sim iā bô-lâng sio-mn̄g
