碎心戀
《碎心戀》Tshuì-sim Luân
麗娜Lē-ná
——————————————
初戀見面相意愛
tshoo-luân kìnn-bīn sio ì-ài
暗中約束驚人知
àm-tiong iok-sok kiann lâng tsai
熱情期待早送定
jia̍t-tsîng kî-thāi tsá sàng-tiānn
一去無來求親情
tsi̍t-khì bô lâi kiû tshin-tsiânn
恨伊絕情將阮放
hūn i tsua̍t-tsîng tsiong gún pàng
變心煞去愛別人
piàn-sim suah khì ài pa̍t-lâng
誤了初戀的希望
gōo liáu tshoo-luân ê hi-bāng
怨嘆看鏡目箍紅
uàn-thàn khuànn kiànn ba̍k-khoo âng
明知佮你無緣份
bîng-tsai kah lí bô iân-hūn
心內為你亂紛紛
sim-lāi uī lí luān hun-hun
怨嘆自己歹命運
uàn-thàn tsū-kí pháinn miā-ūn
忍著痛苦含喙脣
jím tio̍h thòng-khóo kâm tshuì-tûn
你也毋知阮身份
lí iā m̄-tsai gún sin-hūn
一直對阮來求婚
it-ti̍t tuì gún lâi kiû-hun
叫阮怎樣來允准
kiò gún tsuánn-iūnn lâi ún-tsún
傷心目屎準飯吞
siong-sim ba̍k-sái tsún pn̄g thun
明知袂當來做堆
bîng-tsai buē-tàng lâi tsò-tui
偏偏才來愛著你
phian-phian tsiah lâi ài-tio̍h lí
你的真情佮真意
lí ê tsin-tsîng kah tsin-ì
永遠袂得放袂記
íng-uán buē-tit pàng-buē-kì
事到如今欲怎樣
sū kàu jû-kim bueh tsuánn-iūnn
阮也毋敢做主張
gún iā m̄-kánn tsuè tsú-tiunn
今日才知離開你
kim-ji̍t tsiah tsai lī-khui lí
真是痛苦心悲哀
tsin sī thòng-khóo sim pi-ai
