海鳥拜託你
《海鳥拜託你》Hái-tsiáu Pài-thok Lí
顏華Gân Huâ
——————————————
紅紅日頭照落海面
âng-âng ji̍t-thâu tsiò lo̍h hái-bīn
海水紅藍青
hái-tsuí âng-lâm-tshinn
咿~一隻的海鳥飛來
ih~ tsi̍t-tsiah ê hái-tsiáu pue–lâi
歇在甲板邊
hioh tsāi kah-pán pinn
實在有趣味
si̍t-tsāi ū tshù-bī
嘿!實在有趣味
heh! si̍t-tsāi ū tshù-bī
聽著阮唱歌時
thiann-tio̍h gún tshiùnn-kua sî
頭殼激敧敧
thâu-khak kik khi-khi
親像知影
tshin-tshiūnn tsai-iánn
阮心內的歡喜的代誌
gún sim-lāi ê huann-hí ê tāi-tsì
彼一日踮在碼頭
hit-tsi̍t-ji̍t tiàm-tsāi bé-thâu
雙人糖蜜甜
siang-lâng thn̂g-bi̍t-tinn
約束著再會日期
iok-sok tio̍h tsài-huē ji̍t-kî
笑笑來分離
tshiò-tshiò lâi hun-lî
實在有趣味
si̍t-tsāi ū tshù-bī
嘿!實在有趣味
heh! si̍t-tsāi ū tshù-bī
上好是拜託著
siōng-hó sī pài-thok tio̍h
海鳥去揣伊
hái-tsiáu khì tshē i
替阮表示
thè gún piáu-sī
毋敢袂記
m̄-kánn buē-kì
甘蜜的情意
kam-bi̍t ê tsîng-ì
開聲來向對天邊
khui-siann lâi hiòng tuì thinn-pinn
叫著伊名字
kiò tio̍h i miâ-jī
看船邊波浪開花
khuànn tsûn-pinn pho-lōng khui-hue
自慰心稀微
tsū-uì sim hi-bî
實在有趣味
si̍t-tsāi ū tshù-bī
嘿!實在有趣味
heh! si̍t-tsāi ū tshù-bī
海鳥是飛佗去
hái-tsiáu sī pue toh khì
忽然無看見
hut-jiân bô khuànn–kìnn
阮想一定是
gún siūnn it-tīng sī
欲去揣心愛的伴侶
beh khì tshē sim-ài ê phuānn-lī
