悲戀傷心曲
《悲戀傷心曲》Pi-luân Siong-sim Khik
顏華Gân Huâ
——————————————
看見著燕鳥啊
khuànn-kìnn tio̍h iàn-tsiáu–ah
雙雙飛過河
siang-siang pe kè hô
為怎樣怨恨著伊
uī-tsuánn-iūnn uàn-hūn tio̍h i
對阮情意薄
tuì gún tsîng-ì po̍h
啊~對阮情意薄
ah~ tuì gún tsîng-ì po̍h
聽見著蟲聲啊
thiann-kìnn tio̍h thâng-siann–ah
啼叫在窗邊
thî-kiò tsāi thang-pinn
為怎樣倒在床內
uī-tsuánn-iūnn tó tsāi tshn̂g-lāi
傷心想彼時
siong-sim siūnn hit-sî
啊~傷心想彼時
ah~ siong-sim siūnn hit-sî
夢見著郎君啊
bāng-kìnn tio̍h lông-kun–ah
對阮來求愛
tuì gún lâi kiû-ài
為怎樣目睭擘金
uī-tsuánn-iūnn ba̍k-tsiu peh-kim
加添空悲哀
ka-thiam khang pi-ai
啊~加添空悲哀
ah~ ka-thiam khang pi-ai
感覺著秋風啊
kám-kak tio̍h tshiu-hong–ah
像刀遮冷利
tshiūnn to tsiah líng-lāi
為怎樣滿腹熱情
uī-tsuánn-iūnn muá-pak jia̍t-tsîng
望君倒轉來
bāng kun tò-tńg–lâi
啊~望君倒轉來
ah~ bāng kun tò-tńg–lâi
