拍毋見的心
《拍毋見的心》Phàng-kìnn ê Sim
謝金晶Siā Kim-tsing
——————————————
一對白翎鷥
tsi̍t-tuì pe̍h-līng-si
雙雙又對對
siang-siang iū tuì-tuì
飛啊飛
pue–ah pue
飛對彼爿去
pue uì hit-pîng khì
黃昏的光影
hông-hun ê kng-iánn
照著水面金爍爍
tsiàu tio̍h tsuí-bīn kim-sih-sih
我的身邊
guá ê sin-pinn
哪會無你
ná ē bô lí
又閣是阮一个人
iū-koh sī gún tsi̍t-ê-lâng
來面對稀微的光線
lâi bīn-tuì hi-bî ê kng-suànn
無聊的電視
bô-liâu ê tiān-sī
劇本寫啥物
kio̍k-pún siá siánn-mih
一聲一聲哭袂離
tsi̍t-siann-tsi̍t-siann khàu buē-lī
敢是佮我仝款的人生
kám-sī kah guá kāng-khuán ê jîn-sing
你講你毋是刁故意
lí kóng lí m̄-sī thiau-kòo-ì
怪命運對咱來創治
kuài miā-ūn tuì lán lâi tshòng-tī
你的白賊話
lí ê pe̍h-tsha̍t-uē
也已經遐爾濟
iā í-king hiah-nī tsuē
拍毋見的心
phàng-kìnn ê sim
欲去欲去佗位揣
beh khì beh khì tó-uī tshuē
啊~愛已經遮澈底
ah~ ài í-king tsiah thiat-té
我看你欲按怎賠
guá khuànn lí beh án-tsuánn puê
