我的爸爸
《我的爸爸》Guá ê Pá-pah
謝金晶Siā Kim-tsing
——————————————
你的冊讀無濟
lí ê tsheh tha̍k bô-tsuē
毋過真拍拚咧飼家
m̄-koh tsin phah-piànn teh tshī ke
你的話講無濟
lí ê uē kóng bô-tsuē
每一句對我攏是鼓勵
muí tsi̍t-kù tuì guá lóng-sī kóo-lē
你像一班的火車
lí tshiūnn tsi̍t-pan ê hué-tshia
載我唱著
tsài guá tshiùnn tio̍h
一首美麗的情歌
tsi̍t-siú bí-lē ê tsîng-kua
你是暗暝的光線
lí sī àm-mî ê kng-suànn
叫我向前
kiò guá hiòng-tsiân
毋免戇戇徛佇遮
m̄-bián gōng-gōng khiā tī tsia
一句我的爸爸
tsi̍t-kù guá ê pá-pah
一雙手為我閘雨
tsi̍t-siang-tshiú uī guá tsa̍h hōo
為我擋風沙
uī guá tòng hong-sua
你是我的爸爸
lí sī guá ê pá-pah
你的胸坎
lí ê hing-khám
予我啥物攏毋驚
hōo guá siánn-mih lóng m̄-kiann
一句我的爸爸
tsi̍t-kù guá ê pá-pah
你總是恬恬
lí tsóng-sī tiām-tiām
來做阮的靠岸
lâi tsuè gún ê khò-huānn
你是我的爸爸
lí sī guá ê pá-pah
我欲後世人
guá beh āu-sì-lâng
閣叫你一聲爸爸
koh kiò lí tsi̍t-siann pá-pah
