天地無目睭
《天地無目睭》Thinn-tē Bô Ba̍k-tsiu
謝金晶Siā Kim-tsing
——————————————
我已經忝矣
guá í-king thiám–ah
毋願閣忍受落去
m̄-guān koh jím-siū–lo̍h-khì
但是你的自私
tān-sī lí ê tsū-su
親像石頭無心
tshin-tshiūnn tsio̍h-thâu bô-sim
毋管我滿身傷痕
m̄-kuán guá muá-sin siong-hûn
你做你享受
lí tsuè lí hiáng-siū
當做我是破布一樣
tòng-tsuè guá sī phuà-pòo tsi̍t-iūnn
我真正忝矣
guá tsin-tsiànn thiám–ah
無想欲繼續落去
bô siūnn-beh kè-sio̍k–lo̍h-khì
偏偏我的一生
phian-phian guá ê it-sing
縛佇這欉大樹
pa̍k tī tsit tsâng tuā-tshiū
毋管我苦苦哀求
m̄-kuán guá khóo-khóo ai-kiû
你毋捌軟手
lí m̄-bat nńg-tshiú
到底我欲按怎忍受
tàu-té guá beh án-tsuánn jím-siū
天地無目睭
thinn-tē bô ba̍k-tsiu
放我佇苦海泅
pàng guá tī khóo-hái siû
我是頂世人
guá sī tíng-sì-lâng
佮你結冤仇
kah lí kiat-uan-siû
如今才毋放我干休
jû-kim tsiah m̄ pàng guá kan-hiu
天地無目睭
thinn-tē bô ba̍k-tsiu
揣無人來解救
tshuē-bô lâng lâi kái-kiù
假使這世人
khá-sú tsit-sì-lâng
歇了毋著岫
hioh liáu m̄-tio̍h siū
我甘願
guá kam-guān
提性命來換自由
the̍h sìnn-miā lâi uānn tsū-iû
