咱的夢
《咱的夢》Lán ê Bāng
七郎Tshit-lông
——————————————
每一人
muí tsi̍t-lâng
攏有一个夢
lóng ū tsi̍t-ê bāng
只是願望攏無仝款
tsí-sī guān-bāng lóng bô kāng-khuán
有人出世
ū-lâng tshut-sì
做著好命人
tsuè tio̍h hó-miā-lâng
阮敢是註定來做工
gún kám-sī tsù-tiānn lâi tsuè-kang
拍拚的人
phah-piànn ê lâng
無一定會出脫
bô-it-tīng ē tshut-thuat
無拍拚
bô phah-piànn
絕對無希望
tsua̍t-tuì bô hi-bāng
運命好䆀欲怪誰
ūn-miā hó-bái beh kuài siáng
向望天公伯仔
ǹg-bāng thinn-kong-peh–á
鬥相共
tàu-sann-kāng
當初的你
tong-tshoo ê lí
含著目屎將阮送
kâm tio̍h ba̍k-sái tsiong gún sàng
講厝內代誌莫操煩
kóng tshù-lāi tāi-tsì mài tshau-huân
你輕輕對我講
lí khin-khin tuì guá kóng
會踮故鄉耐心等
ē tiàm kòo-hiong nāi-sim tán
叫我拍拚
kiò guá phah-piànn
一定出狀元
it-tīng tshut tsiōng-guân
一个人一个夢
tsi̍t-ê lâng tsi̍t-ê bāng
只要認真有希望
tsí-iàu jīn-tsin ū hi-bāng
毋管雷公怎樣霆
m̄-kuán luî-kong tsuánn-iūnn tân
毋管風雨怎樣淋
m̄-kuán hong-hōo tsuánn-iūnn lâm
只要有夢
tsí-iàu ū bāng
人生才袂變空
jîn-sing tsiah buē piàn khang
一个人一个夢
tsi̍t-ê lâng tsi̍t-ê bāng
有你鼓勵鬥幫忙
ū lí kóo-lē tàu-pang-bâng
毋管山愛偌懸
m̄-kuán suann ài peh guā kuân
毋管愛拍拚幾冬
m̄-kuán ài phah-piànn kuí-tang
只要有夢
tsí-iàu ū bāng
人生才袂變空
jîn-sing tsiah buē piàn khang
拍拚為著咱的夢
phah-piànn uī-tio̍h lán ê bāng
