拍拚男子漢
《拍拚男子漢》Phah-piànn Lâm-tsú-hàn
洪及響Âng Ki̍p-hióng(泉州)
——————————————
人生在世風雨濟
jîn-sing tsāi-sè hong-hōo tsuē
有時跋倒免歹勢
ū sî pua̍h-tó bián pháinn-sè
怨嘆啊無路用
uàn-thàn–ah bô-lōo-iōng
振作免悲傷
tsín-tsok bián pi-siong
有啥人凊彩就成功
ū siánn-lâng tshìn-tshái tiō sîng-kong
人情冷暖看予透
jîn-tsîng líng-luán khuànn hōo thàu
朋友好歹免計較
pîng-iú hó-phái bián kè-kàu
好運嘛會來到
hó-ūn mā ē lâi-kàu
歹運會走了了
phái-ūn ē tsáu liáu-liáu
東山再起終會來到
tong-san tsài-khí tsiong ē lâi-kàu
一步一步向前行
tsi̍t-pōo-tsi̍t-pōo hiòng-tsiân kiânn
繼續努力咧拍拚
kè-sio̍k lóo-li̍k leh phah-piànn
風雨有偌大
hong-hōo ū guā tuā
阮攏毋驚
gún lóng m̄-kiann
一聲一聲男子漢
tsi̍t-siann-tsi̍t-siann lâm-tsú-hàn
奮鬥的路頂愛勇敢
hùn-tàu ê lōo-tíng ài ióng-kám
天公永遠攏會疼戇人
thinn-kong íng-uán lóng ē thiànn gōng-lâng
總有一工
tsóng ū-tsi̍t-kang
阮一定會
gún it-tīng ē
東山再起
tong-san tsài-khí
