青春怨（上）
《青春怨》Tshing-tshun Uàn（上）
愛卿Ài-khing(純純Sûn-sûn = 劉清香Lâu Tshing-hiong)
省三Síng-sam
——————————————
人生相似一孤船
jîn-sing siong-sū it koo-tsûn
朝朝暮暮水上游
tiau-tiau bōo-bōo tsuí-siōng iû
孤船破了閣再補
koo-tsûn phuà-liáu koh-tsài póo
人若死了萬事休
lâng nā sí-liáu bān-sū hiu
月白風清欲斷腸
gua̍t pi̍k hong tshing io̍k tuān-tiông
無限悲愁在心中
bô-hān pi-tshiû tsāi sim-tiong
戀愛第一是情為重
luân-ài tuē-it sī tsîng uî-tiōng
造物弄人大可傷
tsō-bu̍t lōng-jîn tuā khó siong
花前月下流目屎
hua tsiân gua̍t hā lâu ba̍k-sái
青春過了就不再來
tshing-tshun kuè-liáu tsiū put-tsài lâi
禮教束縛上蓋害
lé-kàu sok-pa̍k siōng-kài hāi
壓迫囝兒不應該
ap-pik kiánn-jî put-ing-kai
天公真正創治人
thinn-kong tsin-tsiànn tshòng-tī lâng
新舊思想來無相仝
sin-kū su-sióng–lâi bô sio-kāng
有人全無想別項
ū-lâng tsuân bô siūnn pa̍t-hāng
囝兒愛嫁有錢人
kiánn-jî ài kè ū-tsînn-lâng
