臺北出外人
《臺北出外人》Tâi-pak Tshut-guā-lâng
任珍Jīm-tin
——————————————
臺北拍單閣漸漸歇
Tâi-pak phah-tuann koh tsiām-tsiām hioh
攑頭一看是鶯歌石
gia̍h-thâu tsi̍t khuànn sī Ing-ko-tsio̍h
離爸離母閣上可惜
lî pē lî bú koh siōng khó-sioh
哎喲!離別彼个愛人仔
aih-iō! lī-pia̍t hit ê ài-jîn-á
閣看袂著
koh khuànn buē-tio̍h
緊來走啊咿~
kín lâi tsáu–ah ih~
趕緊來走
kuánn-kín lâi tsáu
趕緊來走咿~
kuánn-kín lâi tsáu ih~
哎!我苦啊
aih! guá khóo–ah
鶯歌拍單
Ing-ko phah-tuann
到啊桃園
kàu–ah Thô-hn̂g
攑頭一看
gia̍h-thâu tsi̍t khuànn
客啊人庄
kheh–ah lâng tsng
離爸離母路頭遠
lî pē lî bú lōo-thâu hn̄g
離別愛人仔割心腸
lî-pia̍t ài-jîn-á kuah sim-tn̂g
桃園拍單到臺中
Thô-hn̂g phah-tuann kàu Tâi-tiong
愛情軁空毋啊通雄
ài-tsîng nǹg-khang m̄–ah thang hiông
勸君仔身體愛保重
khǹg kun–á sin-thé ài pó-tiōng
我身啊趁食姑不將
guá sin–ah thàn-tsia̍h koo-put-tsiong
臺中拍單到彰化
Tâi-tiong phah-tuann kàu Tsiong-huà
彰化對面啊哩嘟
Tsiong-huà tuì-bīn–ah-lih-toh
八卦山
Pat-kuà-suann
若有戀愛啊哩嘟著緊娶
nā ū luân-ài–ah lih-toh tio̍h kín tshuā
無論人家啊哩嘟
bô-lūn jîn-ke–ah-lih-toh
抑煙花
ia̍h ian-hua
彰化拍單到啊嘉義啊
Tsiong-huà phah-tuann kàu–ah Ka-gī–ah
甘願嫁君仔做啊細姨
kam-guān kè kun–á tsuè–ah sè-î
深山林內阮啊敢去
tshim-suann nâ-lāi gún–ah kánn khì
哎喲!甘願啉泔食番薯
aih-iō! kam-guān lim ám tsia̍h han-tsî
嘉義拍單到打狗
Ka-gī phah-tuann kàu Tánn-káu
打狗盤車喂到阿猴
Tá-káu puânn-tshia–uê kàu A-kâu
囡仔欶奶嘛嘛吼
gín-á suh ni mà-mà-háu
我是想君仔喂
guá sī siūnn kun–á–uê
閣目屎流
koh ba̍k-sái lâu
雙人行到閣龍山寺
siang-lâng kiânn kàu koh Liông-san-sī
手攑清香有三枝
tshiú gia̍h tshing-hiunn ū sann-ki
望欲佛祖鬥保庇
bāng-bueh Pu̍t-tsóo tàu pó-pì
哎喲!保庇阮翁仔喔
aih-iō! pó-pì gún ang–á ooh
閣大趁錢
koh tuā thàn-tsînn
