阮的愛人仔是恆春
《阮的愛人仔是恆春》Gún ê Ài-jîn-á Sī Hîng-tshun
凡夫Huân-hu
——————————————
輕輕的海風
khin-khin ê hái-hong
吹著輕輕的海湧
tshue tio̍h khin-khin ê hái-íng
綿綿的雙跤
mî-mî ê siang-kha
踏踮綿綿的海岸
ta̍h tiàm tio̍h mî-mî ê hái-huānn
無事的海鳥
bô-sū ê hái-tsiáu
歇踮坦橫的船頂
hioh tiàm thán-huâinn ê tsûn-tíng
阮的愛人仔
gún ê ài-jîn-á
是美麗的海
sī bí-lē ê hái
一山閣一山
tsi̍t-suann koh tsi̍t-suann
有阮逍遙的跤步
ū gún siau-iâu ê kha-pōo
山頂的野花
suann-tíng ê iá-hue
開甲遐爾燦爛
khui kah hiah-nī tshàn-lān
茄苳樹頂
ka-tang-tshiū tíng
一對山鳥咧恩愛
tsi̍t-tuì suann-tsiáu teh un-ài
阮的愛人仔
gún ê ài-jîn-á
是美麗的山
sī bí-lē ê suann
油蔥的芳甜
iû-tshang ê phang-tinn
全靠多情的落山風
tsuân khò to-tsîng ê lo̍h-suann-hong
親像咱的祖先喔
tshin-tshiūnn lán ê tsóo-sian–ooh
用性命來過臺灣
iōng sìnn-miā lâi kuè Tâi-uân
阿婆仔坐踮前埕
a-pô–á tsē tiàm tsîng-tiânn
唱著歷史的傷痕
tshiùnn tio̍h li̍k-sú ê siong-hûn
阮的愛人仔
gún ê ài-jîn-á
是恆春
sī Hîng-tshun
