星下思情
《星下思情》Tshinn-hā Su-tsîng
黃三元N̂g Sam-guân
——————————————
攑頭來看著天星
gia̍h-thâu lâi khuànn-tio̍h thinn-tshinn
目屎強欲滴
ba̍k-sái kiōng-bueh tih
無聊來過著暗暝
bô-liâu lâi kè tio̍h àm-mî
行對水池邊
kiânn tuì tsuí-tî pinn
深更的夜蟲叫聲
tshim-kinn ê iā-thâng kiò-siann
引阮心內真稀微
ín gún sim-lāi tsin hi-bî
為怎樣留一張
uī-tsuánn-iūnn lâu tsi̍t-tiunn
斷情的批書
tuān-tsîng ê phue-su
大聲來叫著天星
tuā-siann lâi kiò tio̍h thinn-tshinn
替阮揣著伊
thuè gún tshuē-tio̍h i
毋免來予阮稀微
m̄-bián lâi hōo gún hi-bî
心內又傷悲
sim-lāi iū siong-pi
為著伊含著珠淚
uī-tio̍h i hâm tio̍h tsu-luī
時常抱著苦戀味
sî-siông phō tio̍h khóo-luân bī
予阮來叫著伊
hōo gún lâi kiò tio̍h i
心愛的名字
sim-ài ê miâ-jī
天星來粒粒消失
thinn-tshinn lâi lia̍p-lia̍p siau-sit
月娘漸落去
ge̍h-niû tsiām lo̍h–khì
猶原來忍耐勇氣
iáu guân-lâi jím-nāi ióng-khì
目屎吞落去
ba̍k-sái thun–lo̍h-khì
今夜若閣再想
kim-iā nā koh-tsài siūnn
也袂當佮伊來做堆
iā buē-tàng kah i lâi tsuè-tui
提出著男性的
the̍h tshut tio̍h lâm-sìng ê
勇敢的志氣
ióng-kám ê tsì-khì
