我有我的
《我有我的》Guá Ū Guá ê
曾瑋中Tsan Uí-tiong/Kuljelje
——————————————
坐佇暗暝的路邊
tsē tī àm-mî ê lōo-pinn
吹來的風陣陣冷
tshue–lâi ê hong tsūn-tsūn líng
已經毋知有偌久
í-king m̄-tsai ū guā kú
看無沿路的風景
khuànn-bô iân-lōo ê hong-kíng
蹛佇暗暝的稀微
tuà tī àm-mî ê hi-bî
不時提醒夜夜揻
put-sî thê-tshínn iā-iā ui
毋敢閃避毋敢覕
m̄-kánn siám-pī m̄-kánn bih
時間袂為我停止
sî-kan bē uī guá thîng-tsí
我有我的期待
guá ū guá ê kî-thāi
我有我的心願
guá ū guá ê sim-guān
我會忍耐
guá ē jím-nāi
毋管有偌濟阻礙
m̄-kuán ū guā-tsuē tsóo-gāi
彼工總會來
hit-kang tsóng ē lâi
我有我的氣概
guá ū guá ê khì-khài
我有我的勇敢
guá ū guá ê ióng-kám
想欲試看覓
siūnn-beh tshì-khuànn-māi
毋管會變做啥款
m̄-kuán ē piàn-tsuè siánn-khuán
彼工總會來
hit-kang tsóng ē lâi
精彩的未來
tsing-tshái ê bī-lâi
