戇人有天來疼
《戇人有天來疼》Gōng-lâng Ū Thinn Lâi Thiànn
陳昶均Tân Thióng-kun
——————————————
夜靜門埕春山空
iā-tsīng mn̂g-tiânn tshun-suann khang
冷露無聲桂花落
líng-lōo bô-siann kuì-hue lo̍h
秋風送來陣陣芳
tshiu-hong sàng lâi tsūn-tsūn phang
思念阿母的氣味
su-liām a-bú ê khì-bī
抱著滿腹理想
phō tio̍h muá-pak lí-sióng
離開故鄉
lī-khui kòo-hiong
哪知繁華光景
ná tsai huân-huâ kong-kíng
已經無四序
í-king bô sù-sī
青春一去不回頭
tshing-tshun it-khì put huê-thâu
再回頭夢袂圓
tsài huê-thâu bāng buē înn
孤鳥哀啼
koo-tsiáu ai-thî
想欲回鄉里
siūnn-beh huê hiong-lí
月光光天星星
gue̍h kng-kng thinn tshinn-tshinn
親像叫阮緊轉去
tshin-tshiūnn kiò gún kín tńg–khì
踮阿爸阿母的身邊
tiàm a-pa a-bú ê sin-pinn
無成功
bô sîng-kong
免悲傷
bián pi-siong
實實在在來做人
si̍t-si̍t-tsāi-tsāi lâi tsuè-lâng
戇人有天來疼
gōng-lâng ū thinn lâi thiànn
