情春小曲
《情春小曲》Tsîng-tshun Sió-khik
雪蘭Suat-lân
——————————————
望想永久的情愛
bāng-siūnn íng-kiú ê tsîng-ài
予阮實情獻出來
hōo gún si̍t-tsîng hiàn–tshut-lâi
哪知世情無理解
ná tsai sè-tsîng bô lí-kái
一切希望來破害
it-tshè hi-bāng lâi phuà-hāi
幸福受人來拆離
hīng-hok siū lâng lâi thiah-lî
予阮哀怨獨自悲
hōo gún ai-uàn to̍k-tsū pi
望欲佮伊再相見
bāng beh kah i tsài sio-kìnn
毋知著等待底時
m̄-tsai tio̍h tán-thāi tī-sî
百花望欲春天到
pah-hue bāng beh tshun-thinn kàu
阮是等待伊回頭
gún sī tán-thāi i huê-thâu
忽然聽見孤鳥吼
hut-jiân thiann-kìnn koo-tsiáu háu
親像伴阮目屎流
tshan-tshiūnn phuānn gún ba̍k-sái lâu
