女工的心聲
《女工的心聲》Lú-kang ê Sim-siann【南面而歌】
陳珍儀Tân Tin-gî
——————————————
海湧絞滾
hái-íng ká-kún
海風凍
hái-hong tàng
海上的孤帆
hái-siōng ê koo-phâng
前途閣茫茫
tsiân-tôo koh bâng-bâng
想欲繼續讀冊煞袂當
siūnn-beh kè-sio̍k tha̍k-tsheh suah bē-tàng
只好借身份證做女工
tsí-hó tsioh sin-hūn-tsìng tsò lú-kang
線上緊張
suànn-siōng kín-tiunn
雙手一直動
siang-tshiú it-ti̍t tāng
啊~我是線頂小螺絲
ah~ guá sī suànn-tíng sió lôo-si
線上骨力
suànn-siōng kut-la̍t
雙手一直動
siang-tshiú it-ti̍t tāng
我是線頂小螺絲
guá sī suànn-tíng sió lôo-si
無我是毋通
bô guá sī m̄-thang
黃昏日暗出廠房
hông-hun ji̍t-àm tshut tshiúnn-pâng
路上跤踏車
lōo-siōng kha-ta̍h-tshia
濟甲若狗蟻
tsē kah ná káu-hiā
若是紲落加班到深夜
nā-sī suà–lo̍h ka-pan kàu tshim-iā
配著窗外月光睏佇遐
phuè tio̍h thang-guā gue̍h-kng khùn tī hia
線上緊張
suànn-siōng kín-tiunn
雙手一直動
siang-tshiú it-ti̍t tāng
啊~我是線頂小螺絲
ah~ guá sī suànn-tíng sió lôo-si
線上骨力
suànn-siōng kut-la̍t
雙手一直動
siang-tshiú it-ti̍t tāng
厝內經濟有向望
tshù-lāi king-tsè ū ǹg-bāng
就有好眠夢
tiō ū hó bîn-bāng
時代的齒輪一直紡
sî-tāi ê khí-lûn it-ti̍t pháng
阮的青春
gún ê tshing-tshun
紡做白頭鬃
pháng tsuè pe̍h thâu-tsang
查某囝讀冊
tsa-bóo-kiánn tha̍k-tsheh
毋免讓別人
m̄-bián niū pa̍t-lâng
咱若有夢想
lán nā ū bāng-sióng
就毋通放
tō m̄-thang pàng
時代的齒輪一直(一直)紡
sî-tāi ê khí-lûn it-ti̍t (it-ti̍t) pháng
阮的青春
gún ê tshing-tshun
紡做白頭鬃
pháng tsuè pe̍h thâu-tsang
回看行過的
huê khuànn kiânn–kuè ê
酸甘佮苦甜
sng-kam kah khóo-tinn
啊~風停浪靜
ah~ hong thîng lōng tsīng
彩霞滿天
tshái-hâ muá-thinn
