毋通無志氣
《毋通無志氣》M̄-thang Bô Tsì-khì
莊山田Tsng San-tiân
——————————————
看過著遙遠天邊
khuànn-kuè tio̍h iâu-uán thinn-pinn
日落黃昏時
ji̍t-lo̍h hông-hun sî
樹頂的的孤鳥叫啼
tshiū-tíng ê ê koo-tsiáu kiò-thî
宛然叫我愛立志
uán-jiân kiò guá ài li̍p-tsì
雖然是離開故鄉
sui-jiân sī lī-khui kòo-hiong
已經有數年
í-king ū sòo-nî
爸母的交代言語
pē-bú ê kau-tài giân-gí
毋敢放袂記
m̄-kánn pàng-buē-kì
毋管成功抑失敗
m̄-kuán sîng-kong ia̍h sit-pāi
毋通來失志
m̄-thang lâi sit-tsì
異鄉的路燈閃爍
ī-hiong ê lōo-ting siám-sih
伴阮心稀微
phuānn gún sim hi-bî
路邊的夜蟲叫啼
lōo-pinn ê iā-thâng kiò-thî
可比對我來指示
khó-pí tuì guá lâi tsí-sī
踮社會做人
tiàm siā-huē tsuè-lâng
毋通予人看無起
m̄-thang hōo-lâng khuànn-bô-khí
人生啊
jîn-sing–ah
人人總是
lâng-lâng tsóng-sī
靠著一點氣
khò-tio̍h tsi̍t-tiám khuì
毋管啥物不如意
m̄-kuán siánn-mih put-jû-ì
毋通無志氣
m̄-thang bô tsì-khì
