害了了
《害了了》Hāi-liáu-liáu
康丁Khong-ting(張錫圭Tiunn Sik-kui)
——————————————
啊!今死矣囉
ah! tann sí–ah looh
衫褲破一空
sann-khòo phuà tsi̍t-khang
揣來揣去無半項
tshē-lâi-tshē-khì bô-puànn-hāng
揣無針線通補空
tshē-bô tsiam-suànn thang póo khang
害阮見笑面煞紅
hāi gún kiàn-siàu bīn suah âng
為著小姐你一人
uī-tio̍h sió-tsiá lí tsi̍t-lâng
攏袂顧半項
lóng buē kòo puànn-hāng
甘願忍耐用手掩
kam-guān jím-nāi iōng tshiú am
衫褲裂一空
sann-khòo li̍h tsi̍t-khang
啊!今死矣囉
ah! tann sí–ah looh
時間漸漸到
sî-kan tsiām-tsiām kàu
約著小姐欲北投
iok tio̍h sió-tsiá beh Pak-tâu
又欲請伊食中晝
iū beh tshiánn i tsia̍h tiong-tàu
哪會落氣倒翻頭
ná ē làu-khuì tò-huan-thâu
為著小姐遮艱苦
uī-tio̍h sió-tsiá tsiah kan-khóo
想著面著烏
siūnn-tio̍h bīn tiō oo
甘願忍耐毋娶某
kam-guān jím-nāi m̄ tshuā-bóo
棉被罔暫度
mî-phē bóng tsiām-tōo
啊!今死矣囉
ah! tann sí–ah looh
霜風漸漸寒
sng-hong tsiām-tsiām kuânn
敢是欲凍阮無伴
kám-sī beh tàng gún bô-phuānn
想著目屎琵琶彈
siūnn-tio̍h ba̍k-sái pî-pê tuānn
予阮那想那畏寒
hōo gún ná siūnn ná uì-kuânn
愛著小姐欲做某
ài-tio̍h sió-tsiá beh tsuè bóo
敢會塗塗塗
kánn ē thőo-thôo-thôo
寧可莫娶守空房
lîng-khó mài tshuā siú khang-pâng
過著一世人
kè tio̍h tsi̍t-sì-lâng
