孤星淚
《孤星淚》Koo-tshinn Luī
張燕清Tiunn Iàn-tshing
——————————————
孤單的淡水河邊
koo-tuann ê Tām-tsuí-hô pinn
悲傷的滋味
pi-siong ê tsu-bī
一个人
tsi̍t-ê-lâng
一條路
tsi̍t-tiâu lōo
一罐酒
tsi̍t-kuàn tsiú
行規暝
kiânn kui-mî
手牽著往事
tshiú khan tio̍h óng-sū
毋知欲對佗去
m̄-tsai beh tuì toh khì
會當將過去所有
ē-tàng tsiong kuè-khì sóo-ū
放流水
pàng lâu-tsuí
感情毋值錢
kám-tsîng m̄-ta̍t tsînn
只賰親情
tsí tshun tshin-tsîng
予我會當
hōo guá ē-tàng
拭起著男人淚
tshit khí tio̍h lâm-jîn luī
抾起受傷的心碎
khioh khí siū-siong ê sim-tshuì
寫落堅強這兩字
siá lo̍h kian-kiông tsit nn̄g-jī
無論海角抑天邊
bô-lūn hái-kak ia̍h thinn-pinn
想著細漢爸母時
siūnn-tio̍h sè-hàn pē-bú sî
何必為情
hô-pit uī tsîng
就想欲夜夜醉
tiō siūnn-beh iā-iā tsuì
暗淡的天星
àm-tām ê thinn-tshinn
可比拍毋見的勇氣
khó-pí phàng-kìnn ê ióng-khì
家己一个
ka-tī tsi̍t-ê
茫茫徛在路邊
bâng-bâng khiā tsāi lōo-pinn
寂寞的酒味
tsi̍k-bo̍k ê tsiú-bī
淒涼的醉意
tshe-liâng ê tsuì-ì
可比人海中的孤兒
khó-pí jîn-hái tiong ê koo-jî
冷月半爿圓
líng-gue̍h puànn-pîng înn
親像鳥隻離樹枝
tshin-tshiūnn tsiáu-tsiah lî tshiū-ki
揣無今生伴度三更
tshuē-bô kim-sing-phuānn tōo sann-kinn
(揣無今生伴度千年)
(tshuē-bô kim-sing-phuānn tōo tshian-nî)
(揣無今生伴度終身)
(tshuē-bô kim-sing-phuānn tōo tsiong-sin)
悲傷的喘氣
pi-siong ê tshuán-khuì
稀微的空氣
hi-bî ê khong-khì
心酸若像冷夜伴孤星
sim-sng ná-tshiūnn líng-iā phuānn koo-tshinn
(心酸只有攑頭伴孤星)
(sim-sng tsí-ū gia̍h-thâu phuānn koo-tshinn)
(心酸只賰眼淚伴孤星)
(sim-sng tsí tshun gán-luī phuānn koo-tshinn)
—
如果會當重出世
jû-kó ē-tàng tîng tshut-sì
予我有選擇的權利
hōo guá ū suán-ti̍k ê khuân-lī
我願閣一擺
guá guān koh tsi̍t-pái
做恁的囝兒
tsuè lín ê kiánn-jî
娶一个某囝有孝你
tshuā tsi̍t-ê bóo-kiánn iú-hàu lí
毋願閣四界去
m̄-guān koh sì-kè khì
欲做天頂
beh tsuè thinn-tíng
上光的彼粒星
siōng kng ê hit lia̍p tshinn
