青春謠
《青春謠》Tshing-tshun Iâu
李芊慧Lí Tshian-huī
——————————————
阮是十八的年紀
gún sī tsa̍p-pueh ê nî-kí
青春花蕊正當開
tshing-tshun hue-luí tsiànn tong khui
蝴蝶對阮表情義
ôo-tia̍p tuì gún piáu tsîng-gī
予阮暗歡喜
hōo gún àm huann-hí
人生難逢青春期
jîn-sing lân hông tshing-tshun kî
若毋快樂等何時
nā m̄ khuài-lo̍k tán hô-sî
不過阮聽人講起
put-kò gún thiann lâng kóng-khí
愛情半酸甜
ài-tsîng puànn sng-tinn
恐驚為愛來食虧
khióng-kiann uī ài lâi tsia̍h-khui
心內矛盾無地比
sim-lāi mâu-tún bô-tè pí
阮是青春小姑娘
gún sī tshing-tshun sió-koo-niû
生做可愛的模樣
sinn-tsuè khó-ài ê môo-iūnn
快快樂樂真自由
khuài-khuài-lo̍k-lo̍k tsin tsū-iû
無憂佮無愁
bô-iu kah bô-tshiû
對著終身的大事
tuì tio̍h tsiong-sin ê tāi-sū
心內全然無主張
sim-lāi tsuân-jiân bô tsú-tiunn
揣對象應該三思
tshuē tuì-siōng ing-kai sam-su
毋通亂接受
m̄-thang luān tsiap-siū
再三考慮又考慮
tsài-sann khó-lū iū khó-lū
心內感覺真躊躇
sim-lāi kám-kak tsin tiû-tû
