安平純情曲
《安平純情曲》An-pîng Sûn-tsîng Khik
西卿Se-khing
——————————————
歡喜安平船入港
huann-hí An-pîng tsûn ji̍p-káng
傷心看無伊一人
siong-sim khuànn-bô i tsi̍t-lâng
想著心疼痛
siūnn-tio̍h sim thiànn-thàng
離開二十冬
lī-khui jī-tsa̍p tang
坐船做伊轉荷蘭
tsē tsûn tsuè i tńg Hô-lân
害阮每日等
hāi gún muí-ji̍t tán
真情毋甘放
tsin-tsîng m̄-kam pàng
無疑今日分西東
bô-gî kim-ji̍t hun se-tang
音訊全無情也斷
im-sìn tsuân bô tsîng iā tuān
啊~ 海邊只有純情人
ah~ hái-pinn tsí-ū sûn-tsîng-lâng
也無想阮的生死
iā bô siūnn gún ê sinn-sí
自你出外二十年
tsū lí tshut-guā jī-tsa̍p nî
愛囝也出世
ài-kiánn iā tshut-sì
無人通認知
bô-lâng thang jīn-ti
可憐變成私生兒
khó-lîn piàn-sîng su-sing-jî
吵阮欲揣你
tshá gún beh tshē lí
問爹佗位去
mn̄g tia tó-uī khì
予阮傷心目屎滴
hōo gún siong-sim ba̍k-sái tih
身邊只有金十字
sin-pinn tsí-ū kim si̍p-jī
啊~ 怎樣對囝來安慰
ah~ tsuánn-iūnn tuì kiánn lâi an-uì
只恨一生孤單影
tsí hūn it-sing koo-tuann iánn
為囝前途哭出聲
uī kiánn tsiân-tôo khàu tshut-siann
目睭金金看
ba̍k-tsiu kim-kim-khuànn
安平日落山
An-pîng ji̍t lo̍h-suann
海風陣陣凍心肝
hái-hong tsūn-tsūn tàng sim-kuann
怨嘆阮運命
uàn-thàn gún ūn-miā
交著荷蘭兄
kau tio̍h Hô-lân hiann
將阮放捒做你行
tsiong gún pàng-sat tsuè lí kiânn
安平純情的小姐
An-pîng sûn-tsîng ê sió-tsiá
啊~ 只有懷念安平城
ah~ tsí-ū huâi-liām An-pîng-siânn
