相思歌
《相思歌》Siunn-si Kua
鬥鬧熱走唱隊Tàu-lāu-jia̍t Tsáu-tshiàng-tuī
——————————————
前日公園會著君
tsîng-ji̍t kong-hn̂g huē tio̍h kun
怎會遮溫存
tsuánn ē tsiah un-tsûn
害阮心頭掠袂定
hāi gún sim-thâu lia̍h buē-tiānn
規日亂紛紛
kui-ji̍t luān hun-hun
飯也懶食茶懶吞
pn̄g iā lán tsia̍h tê lán thun
睏也袂安穩
khùn iā buē an-ún
怎會這樣想袂伸
tsuánn ē tsit-iūnn siūnn buē tshun
敢是為思君
kánn sī uī su kun
批來批去討厭恨
phue lâi phue khì thó-ià hūn
夢是無準信
bāng sī bô tsún-sìn
既然兩心相意愛
kì-jiân nn̄g-sim sio-ì-ài
哪驚人議論
ná kiann lâng gī-lūn
幾回訂約佇公園
kuí-huê tīng-iok tī kong-hn̂g
時間攏無準
sî-kan lóng bô tsún
相思樹下獨自坐
siunn-si-tshiū hā to̍k-tsū tsē
等到日黃昏
tán-kàu ji̍t hông-hun
批來批去討厭恨
phue lâi phue khì thó-ià hūn
夢是無準信
bāng sī bô tsún-sìn
既然兩心相意愛
kì-jiân nn̄g-sim sio-ì-ài
哪驚人議論
ná kiann lâng gī-lūn
黃昏等到七星出
hông-hun tán-kàu tshit-tshinn tshut
終無看見君
tsiong bô khuànn-kìnn kun
風冷露涼艱苦忍
hong líng lōo liâng kan-khóo lún
堅心來去睏
kian-sim lâi-khì khùn
