落山風咧呼喚
《落山風咧呼喚》Lo̍h-suann-hong Teh Hoo-huàn
林文隆Lîm Bûn-liông
——————————————
落山風的呼喚
lo̍h-suann-hong ê hoo-huàn
叫阮轉去恆春歇喘
kiò gún tńg-khì Hîng-tshun hioh-tshuán
佇山裡佇海裡
tī suann–lìn tī hái–lìn
閣聽著
koh thiann-tio̍h
細漢對天下願
sè-hàn tuì thinn hē-guān
落山風的呼喚
lo̍h-suann-hong ê hoo-huàn
叫阮轉去美麗鄉村
kiò gún tńg-khì bí-lē hiong-tshuan
佇路裡佇街裡
tī lōo–lìn tī ke–lìn
閣聽著
koh thiann-tio̍h
囡仔伴咧吵亂
gín-á-phuānn teh tshá-luān
海底是遮爾媠
hái-té sī tsiah-nī suí
山頂是遮青翠
suann-tíng sī tsiah tshinn-tshuì
恆春調仔
Hîng-tshun-tiāu-á
遮淒美
tsiah tshe-bí
恆春人
Hîng-tshun-lâng
豪爽袂激氣
hô-sóng buē kik-khì
日出是遮光輝
ji̍t-tshut sī tsiah kong-hui
黃昏是遮爾醉
hông-hun sī tsiah-nī tsuì
佇這時
tī tsit-sî
放下著一切
hòng-hā tio̍h it-tshè
會增長咱的智慧
ē tsing-tióng lán ê tì-huī
落山風的呼喚
lo̍h-suann-hong ê hoo-huàn
叫阮探出好景觀
kiò gún thàm tshut hó kíng-kuan
用心用情求圓滿
iōng-sim iōng-tsîng kiû uân-buán
實現一生的心願
si̍t-hiān it-sing ê sim-guān
