月下愁
《月下愁》Gua̍t-hā Tshiû
青春美Tshing-tshun-bí
——————————————
月色冷冷悽慘照
ge̍h-sik líng-líng tshi-tshám tsiò
秋風捷捷吹落葉
tshiu-hong tsia̍p-tsia̍p tshue lo̍h-hio̍h
等君心內懼懼趒
tán kun sim-lāi khū-khū tiô
毋知啥貨喝喝叫
m̄-tsai siánn-hè huah-huah kiò
嘆恨也是為孤單
thàn-hūn iā-sī uī koo-tuann
情愛寫踮在灰沙
tsîng-ài siá tiàm-tsāi hue-sua
空將情景來想看
khang tsiong tsîng-kíng lâi siūnn-khuànn
愁韻幽幽響心肝
tshiû-ūn iu-iu hiáng sim-kuann
溪流慢慢添愁悶
khue-lâu bān-bān thiam tshiû-būn
露水凍落身直顫
lōo-tsuí tàng lo̍h sin ti̍t tsùn
出門揣君笑呅呅
tshut-mn̂g tshuē kun tshiò-bûn-bûn
這陣心才亂紛紛
tsit-tsūn sim tsiah luān-hun-hun
