無情的女性
《無情的女性》Bô-tsîng ê Lú-sìng
李清風Lí Tshing-hong
——————————————
無情月娘笑微微
bô-tsîng ge̍h-niû tshiò bî-bî
悲戀行溪墘
pi-luân kiânn khue-kînn
頭殼看低無元氣
thâu-khak khuànn kē bô guân-khì
心肝若想怨當時
sim-kuann nā siūnn uàn tong-sî
當時愛情拆分離
tong-sî ài-tsîng thiah hun-lî
變心真無疑
piàn-sim tsin bô-gî
憤慨目屎強欲滴
hùn-khài ba̍k-sái kiōng-bueh tih
可比孤鳥月下啼
khó-pí koo-tsiáu gua̍t-hā thî
↓↓(口白)—(口白)↓↓
啊!今仔日我來覺悟
ah! kin-á-ji̍t guá lâi kak-ngōo
覺悟戀愛就是愛錢
kak-ngōo luân-ài tsiū-sī ài tsînn
有錢就有愛
ū-tsînn tsiū ū ài
我毋來閣再想囉
guá m̄ lâi koh-tsài siūnn–looh
甘願看破
kam-guān khuànn-phuà
我欲來再生的路
guá beh lâi tsài-sing ê lōo
認真來拍拚
jīn-tsin lâi phah-piànn
做著一个
tsuè tio̍h tsi̍t-ê
有志氣的男子漢啦
ū tsì-khì ê lâm-tsú-hàn–lah
↑↑(口白)—(口白)↑↑
看破夜景吐大氣
khuànn-phuà iā-kíng thóo-tuā-khuì
純情受克虧
sûn-tsîng siū khik-khui
女性奢華欲妝媠
lú-sìng tshia-hua bueh tsng suí
愛錢也無分是非
ài tsînn iā bô hun sī-hui
是非無分貧富貴
sī-hui bô hun pîn-hù-kuì
無想初做堆
bô siūnn tshoo tsuè-tui
一片真情變流水
tsi̍t-phìnn tsin-tsîng piàn lâu-tsuí
覺悟戀愛是虛偽
kak-ngōo luân-ài sī hi-guī
