《青春的嫁粧》Tshing-tshun ê Kè-tsng
江志豐Kang Tsì-hong
——————————————
越頭看過去的日子
ua̍t-thâu khuànn kuè-khì ê ji̍t-tsí
鹹酸苦澀也帶甜
kiâm-sng khóo-siap iā tài tinn
明仔載
bîn-á-tsài
咱欲行入新的開始
lán beh kiânn-ji̍p sin ê khai-sí
女人一生的青春
lú-jîn it-sing ê tshing-tshun
阮將一切交予你
gún tsiong it-tshè kau hōo lí
你愛疼阮到老彼一日
lí ài thiànn gún kàu lāu hit-tsi̍t-ji̍t
心內亂紛紛的暗暝
sim-lāi luān-hun-hun ê àm-mî
一暝親像過一年
tsi̍t-mî tshin-tshiūnn kuè tsi̍t-nî
回想起
huê-sióng khí
叫我嫁你彼一日
kiò guá kè lí hit-tsi̍t-ji̍t
金金看你的目睭
kim-kim khuànn lí ê ba̍k-tsiu
叫我收你的手指
kiò guá siu lí ê tshiú-tsí
講欲予我
kóng beh hōo guá
過幸福的日子
kuè hīng-hok ê ji̍t-tsí
陣陣炮仔聲
tsūn-tsūn phàu-á-siann
拜別養育的家門
pài-pa̍t ióng-io̍k ê ka-mn̂g
含著悲摻喜的淚痕
kâm tio̍h pi tsham hí ê luī-hûn
慢慢行倚你
bān-bān kiânn uá lí
溫暖的手牽著阮
un-luán ê tshiú khan-tio̍h gún
以後咱翁某坐仝船
í-āu lán ang-bóo tsē kāng tsûn
未來的人生
bī-lâi ê jîn-sing
毋管有偌長
m̄-kuán ū guā tn̂g
我的青春
guá ê tshing-tshun
做你的嫁粧
tsuè lí ê kè-tsng
