陣頭囡仔
《陣頭囡仔》Tīn-thâu Gín-á
江志豐Kang Tsì-hong
——————————————
畫上彩色的面譜
uē siōng tshái-sik ê bīn-phóo
是代表神聖
sī tāi-piáu sîn-sìng
手持各種的武器
tshiú tshî kok-tsióng ê bú-khì
是代表正義
sī tāi-piáu tsìng-gī
踏著一定的跤步
ta̍h-tio̍h it-tīng ê kha-pōo
是代表威儀
sī tāi-piáu ui-gî
阮是代表巡視的神明
gún sī tāi-piáu sûn-sī ê sîn-bîng
阮是象徵神聖的使者
gún sī siōng-ting sîn-sìng ê sù-tsiá
掃平路上邪靈
sàu-pîng lōo-siōng siâ-lîng
淨化五濁惡氣
tsīng-huà gōo-to̍k ok-khì
莫閣掛上有色的目鏡
mài koh kuà siōng ū-sik ê ba̍k-kiànn
看陣頭囡仔
khuànn tīn-thâu gín-á
彼是恁無了解
he sī lín bô liáu-kái
陣頭的傳統佮文化
tīn-thâu ê thuân-thóng kah bûn-huà
逐工練習
ta̍k-kang liān-si̍p
是阮對神明的一種虔誠
sī gún tuì sîn-bîng ê tsi̍t-tsióng khiân-sîng
恁是提香咧綴拜
lín sī the̍h hiunn teh tuè pài
阮舞動身軀的陣型
gún bú-tōng sin-khu ê tīn-hîng
攏是對神明的尊敬
lóng-sī tuì sîn-bîng ê tsun-kìng
無啥物差別
bô-siánn-mih tsha-pia̍t
無啥物無仝
bô-siánn-mih bô-kāng
請恁予阮
tshiánn lín hōo gún
加一寡鼓勵佮掌聲
ke tsi̍t-kuá kóo-lē kah tsiáng-siann
阮嘛是代表
gún mā sī tāi-piáu
臺灣的一種文化
Tâi-uân ê tsi̍t-tsióng bûn-huà
予阿啄仔看見
hōo a-tok-á khuànn-kìnn
咱的歷史佮傳統
lán ê li̍k-sú kah thuân-thóng
予世界知影
hōo sè-kài tsai-iánn
咱臺灣無仝款的面容
lán Tâi-uân bô kāng-khuán ê bīn-iông
請你予阮
tshiánn lí hōo gún
加一寡仝款的眼神
ke tsi̍t-kuá kāng-khuán ê gán-sîn
請你予阮
tshiánn lí hōo gún
加一寡仝款的期待
ke tsi̍t-kuá kāng-khuán ê kî-thāi
阮會好好做予祢看
gún ē hó-hó tsuè hōo lín khuànn
阮會好好做予祢看
gún ē hó-hó tsuè hōo lín khuànn
綴著祢的跤步
tuè tio̍h lín ê kha-pōo
行天地間的正氣
hîng thinn-tē-kan ê tsìng-gī
綴著祢的跤步
tuè tio̍h lín ê kha-pōo
行天地間的正義
hîng thinn-tē-kan ê tsìng-gī
