穿牛仔褲的小姐
《穿牛仔褲的小姐》Tshīng Gû-á-khòo ê Sió-tsiá
丁黛Ting Tāi
——————————————
無論是好天
bô-lūn sī hó-thinn
抑是歹天
ia̍h-sī pháinn-thinn
伊攏是
i lóng-sī
穿著牛仔褲出門去
tshīng tio̍h gû-á-khòo tshut-mn̂g khì
為啥物
uī-siánn-mih
實在予人愈想愈怪奇
si̍t-tsāi hōo-lâng jú siūnn jú kuài-kî
可能是伊怪脾氣
khó-lîng sī i kuài phî-khì
對洋裝無趣味
tuì iûnn-tsong bô tshù-bī
愛扭掠兼愛合身
ài liú-lia̍h kiam ài ha̍h-sin
才會每日穿按呢
tsiah ē muí-ji̍t tshīng án-ni
無論是寒天
bô-lūn sī kuânn-thinn
抑是熱天
ia̍h-sī jua̍h-thinn
伊攏是
i lóng-sī
穿著牛仔褲過日子
tshīng tio̍h gû-á-khòo kè ji̍t-tsí
為啥物
uī-siánn-mih
實在予人愈想愈怪奇
si̍t-tsāi hōo-lâng jú siūnn jú kuài-kî
可能是伊欲表示
khó-lîng sī i beh piáu-sī
苗條的好體態
miâu-tiâu ê hó thé-thài
會活潑閣會古錐
ē ua̍t-phuat koh ē kóo-tsui
才會不時穿按呢
tsiah ē put-sî tshīng án-ni
無論做工課
bô-lūn tsuè khang-khè
抑是看戲
ia̍h-sī khuànn-hì
伊攏是
i lóng-sī
穿著牛仔褲較慣勢
tshīng tio̍h gû-á-khòo khah kuàn-sì
為啥物
uī-siánn-mih
實在予人愈想愈怪奇
si̍t-tsāi hōo-lâng jú siūnn jú kuài-kî
可能是伊無愛費氣
khó-lîng sī i bô-ài huì-khì
愛方便無愛媠
ài hong-piān bô-ài suí
又性格又合時機
iū sìng-keh iū ha̍h sî-ki
才會定定穿按呢
tsiah ē tiānn-tiānn tshīng án-ni
