媽媽的一封信
《媽媽的一封信》Má-mah ê Tsi̍t-hong Sìn
丁黛Ting Tāi
——————————————
自從囝兒出家門
tsū-tsiông kiánn-jî tshut ka-mn̂g
媽媽不時咧心悶
má-mah put-sî teh sim būn
想欲寫批寄予你
siūnn-beh siá-phue kià hōo lí
提筆毋知怎寫起
the̍h pit m̄-tsai tsuánn siá khí
只有想囝叫名字
tsí-ū siūnn kiánn kiò miâ-jī
啊~媽媽思念你
ah~ má-mah su-liām lí
句句句句
kù-kù kù-kù
句句全是親情義
kù-kù tsuân sī tshin-tsîng-gī
離別彼時裝笑容
lî-pia̍t hit-sî tsng tshiò-iông
媽媽知影心悲傷
má-mah tsai-iánn sim pi-siong
為國效勞是光榮
uī kok hāu-lô sī kong-îng
哪通只念母囝情
ná thang tsí liām bú-kiánn tsîng
百戰榮歸是所望
pik-tsiàn îng-kui sī sóo-bāng
啊~媽媽希望你
ah~ má-mah hi-bāng lí
男兒男兒
lâm-jî lâm-jî
男兒愛知責任重
lâm-jî ài tsai tsik-jīm tāng
此去路遠情又長
tshú khì lōo hn̄g tsîng iū tn̂g
時常寫批毋通斷
sî-siông siá-phue m̄-thang tn̄g
家內的事免憂悶
ka-lāi ê sū bián iu-būn
一切由母來擔當
it-tshè iû bú lâi tam-tng
全心為國去拍拚
tsuân sim uī kok khì phah-piànn
啊~媽媽祈求你
ah~ má-mah kî-kiû lí
望你望你
bāng lí bāng lí
望你成功早轉來
bāng lí sîng-kong tsá tńg–lâi
