細雪
《細雪》Sè-suat
謝雷Siā Luî
——————————————
深山的細雪綿綿
tshim-suann ê suè-seh mî-mî
飄入你我愛情窗邊
phiau-ji̍p lí guá ài-tsîng thang-pinn
你一杯
lí tsi̍t-pue
我一杯
guá tsi̍t-pue
甘心醉落去
kam-sim tsuì–lo̍h-khì
你我的惜別暗暝
lí guá ê sioh-pia̍t àm-mî
酒也帶著酸苦味
tsiú iā tuà tio̍h sng-khóo bī
纏綿情話趁今夜
tînn-mî tsîng-uē thàn kim-iā
盡量來表示
tsīn-liōng lâi piáu-sī
窗前的淒涼夜景
thang-tsîng ê tshe-liâng iā-kíng
引人心空虛
ín lâng sim khang-hi
啊~細雪也了解咱悲意
ah~ suè-seh iā liáu-kái lán pi-ì
冷淡的細雪綿綿
líng-tām ê suè-seh mî-mî
顛倒添咱炎熱情意
tian-tò thiam lán iām-jia̍t tsîng-ì
你的情
lí ê tsîng
我的意
guá ê ì
留念在心邊
liû-liām tsāi sim-pinn
相逢的溫暖春天
siong-hông ê un-luán tshun-thinn
也在這个小山坑
iā tsāi tsit ê sió suann-khinn
今夜雖然真冷冰
kim-iā sui-jiân tsin líng-ping
何必珠淚滴
hô-pit tsu-luī tih
閣一杯惜別的酒
koh tsi̍t-pue sioh-pia̍t ê tsiú
回復咱元氣
huê-ho̍k lán guân-khì
啊~細雪也了解咱悲意
ah~ suè-seh iā liáu-kái lán pi-ì
