戀戀大員
《戀戀大員》Luân-luân Tāi-uân
謝銘祐Tsiā Bîng-iū
—————————————–
牽腸掛肚的巷內
khan-tn̂g-kuà-tōo ê hāng-lāi
風對海中央吹來
hong tuì hái tiong-ng tshue lâi
幾痕蚵殼灰 雺霧黃昏的紅磚
kuí hûn ô-khak-hue, bông-bū hông-hun ê âng-tsng
伊咧等待啥物人
i leh tán-thāi siánn-mih lâng
坐佇椅條頂的夢
tsē tī í-liâu tíng ê bāng
時間搖啊搖 行過有若無
sî-kan iô ah iô, kiânn kuè ū ná bô
若彼束束縛伊愛人仔的烏頭鬃
ná hit sok sok-pa̍k i ài-jîn-á ê oo-thâu-tsang
茫茫的海面東南也西北
bâng-bâng ê hái-bīn tang-lâm iā sai-pak
恬恬的港邊春夏又秋冬
tiām-tiām ê káng-pinn tshun-hā iū tshiu-tang
迎來送往的船隻
ngiâ-lâi-sàng-óng ê tsûn-tsiah
換新棄舊的身影
uānn-sin-khì-kū ê sin-iánn
陪伊渺渺的向望
puê i biáu-biáu ê ǹg-bāng
思念是唱袂完的一首歌
su-liām sī tshiùnn buē uân ê tsi̍t siú kua
踅佇咧毋出聲的熱蘭遮
se̍h tī-leh m̄ tshut-siann ê Jia̍t-lân-jia
歌唸啊唸成詩
kua liām ah liām sîng si
伊等啊等成癡
i tán ah tán sîng tshi
海風吹來 吹來 吹來
hái-hong tshue lâi, tshue lâi, tshue lâi
