我佇黃昏的水邊等你
《我佇黃昏的水邊等你》Guá Tī Hông-hun ê Tsuí-pinn Tán Lí
簡雅子Kán Ngá-tsú
——————————————
我佇水邊等你
guá tī tsuí-pinn tán lí
佇黃昏的水邊
tī hông-hun ê tsuí-pinn
等你自東向西
tán lí tsū tang hiòng sai
盤山過嶺
puânn-suann-kuè-niá
跤跡一步一步
kha-jiah tsi̍t-pōo-tsi̍t-pōo
行向大海
kiânn hiòng tuā-hái
我佇水邊等你
guá tī tsuí-pinn tán lí
佇黃昏的水邊
tī hông-hun ê tsuí-pinn
等你自東向西
tán lí tsū tang hiòng sai
盤山過嶺
puânn-suann-kuè-niá
跤跡一步一步
kha-jiah tsi̍t-pōo-tsi̍t-pōo
行向大海
kiânn hiòng tuā-hái
你一分一寸暗落去
lí tsi̍t-hun tsi̍t-tshùn àm–lo̍h-khì
惜別的話含佇喙內
sioh-pia̍t ê uē kâm tī tshuì-lāi
毋敢講
m̄-kám kóng
只好伸手
tsí-hó tshun-tshiú
一筆一劃借水寫字
tsi̍t-pit tsi̍t-ue̍h tsioh tsuí siá-jī
水鴨對草裡泅出
tsuí-ah tuì tsháu–lín siû–tshut
啄破安慰的話語
tok phuà an-uì ê uē-gí
阮冷冷看雲
guán líng-líng khuànn hûn
滿面含笑意
muá-bīn hâm tshiàu-ì
請風寄詩
tshiánn hong kià si
寫字不如送胭脂
siá-jī put-jû sàng ian-tsi
—
請風寄詩
tshiánn hong kià si
寫字不如送胭脂
siá-jī put-jû sàng ian-tsi
