薰煙夢
《薰煙夢》Hun-ian Bāng
方怡萍Png Î-phîng
——————————————
手攑薰吹雙啊頭捅
tshiú gia̍h hun-tshue siang–ah thâu thóng
一陣薰煙一陣茫
tsi̍t-tsūn hun-ian tsi̍t-tsūn bông
愛人仔無來是你戇
ài-jîn–á bô lâi sī lí gōng
石門對去阿里磅
Tsio̍h-mn̂g tuì khì A-lí-pōng
黃昏鳥隻飛向東
hông-hun tsiáu-tsiah pue hiòng tong
鴛鴦水鴨喜相逢
uan-iunn tsuí-ah hí-siong-hông
千言萬語真心話
tshian-giân bān-gú tsin-sim uē
欲來親喙對你講
beh lâi tshin-tshuì tuì lí kóng
清水過來梧棲港
Tshing-tsuí kuè-lâi Gôo-tshe-káng
全家攏是討海人
tsuân-ke lóng-sī thó-hái-lâng
阮是單純漁村女
gún sī tan-sûn hî-tshuan-lí
留在厝內補破網
lâu tsāi tshù-lāi póo phuà-bāng
門口埕外相思欉
mn̂g-kháu-tiânn guā siunn-si-tsâng
刻有名字咱兩人
khik ū miâ-jī lán nn̄g-lâng
為欲等君早轉來
uī bueh tán kun tsá tńg–lâi
祈禱總是在早暗
kî-tó tsóng-sī tsāi tsá-àm
窗外罩著霧茫茫
thang-guā tà tio̍h bū bông-bông
夜鶯叫聲心齊戇
iā-ing kiò-siann sim tsiâu gōng
阿君仔一去無倒轉
a-kun-á tsi̍t-khì bô tò-tńg
也無批信來相通
iā bô phue-sìn lâi siong-thong
跪在沙埔搧海風
kuī tsāi sua-poo siàn hái-hong
無風哪會起波浪
bô hong ná ē khí pho-lōng
阿君仔不該遮爾戇
a-kun-á put-kai tsiah-nī gōng
抑是嫌阮田庄倯
ia̍h-sī hiâm gún tshân-tsng-sông
