新娘的期待
《新娘的期待》Sin-niû ê Kî-thāi
玟靈Bûn-lîng
——————————————
兩人選著一个好日子
nn̄g-lâng suán tio̍h tsi̍t-ê hó ji̍t-tsí
穿新娘衫
tshīng sin-niû-sann
來等待準備
lâi tán-thāi tsún-pī
舞臺放著
bú-tâi pàng tio̍h
咱自細漢的相片
lán tsū sè-hàn ê siòng-phìnn
一直到咱熟似的過去
it-ti̍t kàu lán si̍k-sāi ê kuè-khì
講著感謝爸母恩情的話
kóng-tio̍h kám-siā pē-bú un-tsîng ê uē
阮的目屎
gún ê ba̍k-sái
煞不覺滴落
suah put-kak tih–lueh
現場祝福的
hiān-tiûnn tsiok-hok ê
掌聲佮鼓勵
tsióng-siann kah kóo-lē
手捀酒杯
tshiú phâng tsiú-pue
感謝恁逐家
kám-siā lín ta̍k-ke
我感覺家己閣青春
guá kám-kak ka-kī koh tshing-tshun
是姻緣線
sī in-iân suànn
來牽著咱緣份
lâi khan-tio̍h lán iân-hūn
我若是度過了青春
guá nā-sī tōo kuè-liáu tshing-tshun
這段緣份敢會來
tsit tuānn iân-hūn kám ē lâi
阮的心內自己也毋知
gún ê sim-lāi tsū-kí iā m̄-tsai
啊~天地你敢知
ah~ thinn-tē lí kám tsai
新娘心內的期待
sin-niû sim-lāi ê kî-thāi
阮對你無任何要求
gún tuì lí bô jīm-hô iau-kiû
只要將阮囥心內
tsí-iàu tsiong gún khǹg sim-lāi
啊~希望你會知
ah~ hi-bāng lí ē tsai
今生註定的翁婿
kim-sing tsù-tiānn ê ang-sài
對阮好
tuì gún hó
無任何理由
bô jīm-hô lí-iû
咱幸福的未來
lán hīng-hok ê bī-lâi
是阮的期待
sī gún ê kî-thāi
