飼雞做生理
《飼雞做生理》Tshī Ke Tsuè-sing-lí
黃西田N̂g Se-tiân
——————————————
人講我踮農村
lâng kóng guá tiàm lông-tshuan
生活閣真趣味
sing-ua̍h koh tsin tshù-bī
透早就雞鵤仔啼
thàu-tsá tiō ke-kak-á thî
也毋免出鄉里
iā m̄-bián tshut hiunn-lí
我是安份守己
guá sī an-hūn siú-kí
飼雞仔做生理
tshī ke-á tsuè-sing-lí
啊土雞肉雞攏有飼
ah thóo-ke bah-ke lóng ū tshī
尤其是生卵雞
iû-kî sī senn-nn̄g-ke
我上趣味
guá siōng tshù-bī
生卵雞閣趁大錢
senn-nn̄g-ke koh thàn-tuā-tsînn
透早
thàu-tsá
啊門一下共伊開
ah mn̂g tsi̍t-ē kā-i khui
伊就咯咯咯
i tō ko̍k-ko̍k-ko̍k…
啊一胎生兩粒
ah tsi̍t-the sinn nn̄g-lia̍p
閣上準時
koh siōng tsún-sî
上蓋呵咾
siōng-kài o-ló
是彼隻老雞母
sī hit tsiah lāu ke-bú
一日咧生卵
tsi̍t-ji̍t teh sinn-nn̄g
閣擋上久
koh tòng siōng kú
害阮對伊煞有感情
hāi gún tuì i suah ū kám-tsîng
朋友你若想欲
pîng-iú lí nā siūnn-beh
做啊生啊理
tsuè–ah sing–ah lí
報恁飼雞仔
pò lín tshī ke-á
閣穩啊趁錢
koh ún–ah thàn-tsînn
衛生著愛顧予好
uē-sing tio̍h-ài kòo hōo hó
啊飼料一定愛攢四序
ah tshī-liāu it-tīng ài tshuân sù-sī
保證時到
pó-tsìng sî–kàu
伊就自然咯咯咯
i tiō tsū-jiân ko̍k-ko̍k-ko̍k…
生著大粒營養的雞卵
sinn tio̍h tuā-lia̍p îng-ióng ê ke-nn̄g
予恁大啊大趁錢
hōo lín tuā–ah tuā thàn-tsînn
