臺灣姑娘
《臺灣姑娘》Tâi-uân Koo-niû
廖美惠Liāu Bí-huī
——————————————
阮是明朗職業女性
gún sī bîng-láng tsit-gia̍p lú-sìng
透早笑文文
thàu-tsá tshiò bûn-bûn
身穿紅衫配綠裙
sin tshīng âng-sann phuè li̍k-kûn
可愛當青春
khó-ài tng tshing-tshun
每日做工守本份
muí-ji̍t tsuè-kang siú pún-hūn
風雨也出勤
hong-ú iā tshut-khûn
甘願勞苦無怨恨
kam-guān lô-khóo bô uàn-hūn
欲等好郎君
beh tán hó lông-kun
阮是明朗職業女性
gún sī bîng-láng tsit-gia̍p lú-sìng
像花當含蕊
tshiūnn hue tng hâm-luí
毋驚野蜂亂追隨
m̄-kiann iá-phang luān tui-suî
毋敢亂亂開
m̄-kánn luān-luān khui
自立自守花園位
tsū-li̍p tsū-siú hue-hn̂g uī
真情來等伊
tsin-tsîng lâi tán i
花望戀風甘露水
hue bāng luân-hong kam-lōo-tsuí
真心來做堆
tsin-sim lâi tsuè-tui
阮是明朗職業女性
gún sī bîng-láng tsit-gia̍p lú-sìng
活潑聰明性
ua̍t-phuat tshong-bîng sìng
雖是風霜心也清
sui sī hong-song sim iā tshing
希望求功名
hi-bāng kiû kong-bîng
毋管郎君啥環境
m̄-kuán lông-kun siánn khuân-kíng
盡情無嫌窮
tsīn-tsîng bô hiâm khîng
熱心好夢毋驚冷
jia̍t-sim hó-bāng m̄-kiann líng
希望良緣成
hi-bāng liông-iân sîng
