山
《山》Suann
黃肯迪N̂g Khíng-ti̍k
——————————————
唱的毋是好聽情歌
tshiùnn–ê m̄-sī hó-thiann tsîng-kua
定定思念是你的聲
tiānn-tiānn su-liām sī lí ê siann
為生活做三份工
uī sing-ua̍h tsò sann-hūn kang
上珍惜陪你翕的相
siōng tin-sioh puê lí hip ê sio
陪你做的夢
puê lí tsò ê bāng
飯菜著愛熥予燒來食
pn̄g-tshài tio̍h-ài thn̄g hōo sio lâi tsia̍h
等我下班
tán guá hā-pan
你敢睏會飽
lí kám khùn ē pá
烏陰天敢有紮雨傘
oo-im-thinn kám ū tsah hōo-suànn
敢有啥物代誌
kám ū siánn-mih tāi-tsì
是你有孝
sī lí iú-hàu
毋敢予阮知影
m̄-kánn hōo gún tsai-iánn
伴阮的你是風
phuānn gún ê lí sī hong
吹來十外冬
tshue lâi tsa̍p-guā tang
天頂白茫茫
thinn-tíng pe̍h-bâng-bâng
我甘願一个人
guá kam-guān tsi̍t-ê-lâng
我若艱苦畏寒
guá nā kan-khóo uì-kuânn
你毋免驚
lí m̄-bián kiann
山也永遠徛佇遮
suann iā íng-uán khiā tī tsia
看著親像阮的目睭
khuànn-tio̍h tshin-tshiūnn gún ê ba̍k-tsiu
陪你開講
puê lí khai-káng
假做輕鬆
ké-tsò khin-sang
教你人生的路
kà lí jîn-sing ê lōo
欲按怎行
beh án-tsuánn kiânn
恬恬款你的行李
tiām-tiām khuán lí ê hîng-lí
佮阮難捨的心情
kah gún lân-siá ê sim-tsiânn
伴阮的你是風
phuānn gún ê lí sī hong
吹來十外冬
tshue lâi tsa̍p-guā tang
天頂白茫茫
thinn-tíng pe̍h-bâng-bâng
我甘願一个人
guá kam-guān tsi̍t-ê-lâng
我若艱苦畏寒
guá nā kan-khóo uì-kuânn
你毋免驚
lí m̄-bián kiann
山也永遠徛佇遮
suann iā íng-uán khiā tī tsia
伴阮的你是風
phuānn gún ê lí sī hong
吹來十外冬
tshue lâi tsa̍p-guā tang
早慢會到你離開彼一工
tsá-bān ē kàu lí lī-khui hit tsi̍t-kang
我會煩惱毋甘
guá ē huân-ló m̄-kam
淡薄仔孤單
tām-po̍h-á koo-tuann
山也永遠等佇遮
suann iā íng-uán tán tī tsia
緣份會散
iân-hūn ē suànn
目屎也會焦
ba̍k-sái iā ē ta
你猶原是阮的心肝
lí iu-guân sī gún ê sim-kuann
