掠魚人
《掠魚人》Lia̍h-hî-lâng
小鳳鳳Sió-hōng-hōng(童欣Tông Him, 馬來西亞)
——————————————
阮是一个掠魚人
gún sī tsi̍t-ê lia̍h-hîr-lâng
故鄉踮佇五條港
kòo-hiong tiàm-tī Gōo-tiâu-káng
三更半暝來出帆
sann-kinn-puànn-mî lâi tshut-phâng
四邊烏烏又暗暗
sì-pinn oo-oo iū àm-àm
海風吹來真正寒
hái-hong tshue–lâi tsin-tsiànn kuânn
海水潑來
hái-tsuí phuah–lâi
凍冷阮的心肝
tàng líng gún ê sim-kuann
為著三頓來拍拚
uī-tio̍h sann-tǹg lâi phah-piànn
為著厝內的某囝
uī-tio̍h tshù-lāi ê bóo-kiánn
大風大湧是算啥
tuā-hong tuā-íng sī sǹg siánn
啊~雖然風險有較重
ah~ sui-jiân hong-hiám ū khah tāng
神明保庇阮平安
sîn-bîng pó-pì gún pîng-an
看著魚蝦一籠籠
khuànn-tio̍h hîr-hê tsi̍t-láng-láng
心情真輕鬆
sim-tsîng tsin khin-sang
阮是勇敢
gún sī ióng-kám
拍拚的掠魚人
phah-piànn ê lia̍h-hîr-lâng
