戀愛的所在
《戀愛的所在》Luân-ài ê Sóo-tsāi
賴慧如Luā Huī-jû
——————————————
行入咱約會的咖啡屋
kiânn-ji̍p lán iok-huē ê kāfēiwū
點一杯你上愛的咖啡
tiám tsi̍t-pue lí siōng ài ê ka-pi
看著金魚缸內的金魚
khuànn-tio̍h kim-hî-kng lāi ê kim-hî
慢慢慢阮想起過去
bān bān bān gún siūnn-khí kuè-khì
雖然當初對愛是認真
sui-jiân tong-tshoo tuì ài sī jīn-tsin
嘛愛考慮爸母的擔心
mā ài khó-lú pē-bú ê tam-sim
咱攏愛為將來前途犧牲
lán lóng ài uī tsiong-lâi tsiân-tôo hi-sing
只好聽話Ending這段情
tsí-hó thiann-uē Ending tsit tuānn tsîng
天頂的天星閃閃爍爍
thinn-tíng ê thinn-tshinn siám-siám-sih-sih
伊叫阮毋通閣再傷悲
i kiò gún m̄-thang koh-tsài siong-pi
我毋知所有愛的記持
guá m̄-tsai sóo-ū ài ê kì-tî
敢會當將伊放予袂記
kám ē-tàng tsiong i pàng hōo buē-kì
啉一喙你上愛的咖啡
lim tsi̍t-tshuì lí siōng ài ê ka-pi
看雙雙對對的金魚
khuànn siang-siang-tuì-tuì ê kim-hî
阮會將你藏佇心肝內
gún ē tsiong lí tshàng tī sim-kuann-lāi
藏佇金魚戀愛的所在
tshàng tī kim-hî luân-ài ê sóo-tsāi
