流星
《流星》Liû-tshinn
蕭玉芬Siau Gio̍k-hun
——————————————
鬧熱的火車站
lāu-jia̍t ê hué-tshia-tsām
望啊望
bāng–ah bāng
等無阮愛的人來相送
tán-bô gún ài ê lâng lâi sio-sàng
一粒心遮沉重
tsi̍t-lia̍p sim tsiah tîm-tāng
按怎放
án-tsuánn pàng
行李是阮滿滿的掛念
hîng-lí sī gún muá-muá ê kuà-liām
心肝內的向望
sim-kuann-lāi ê ǹg-bāng
攏是你的人
lóng-sī lí ê lâng
這心情欲怎掩崁
tse sim-tsîng beh tsuánn am-khàm
車窗外漸漸暗
tshia-thang guā tsiām-tsiām àm
火車欲到站
hué-tshia beh kàu-tsām
阮的夢
gún ê bāng
愈來愈遙遠
jú lâi jú iâu-uán
將阮思念的目屎
tsiong gún su-liām ê ba̍k-sái
變做天頂的流星
piàn-tsuè thinn-tíng ê liû-tshinn
一滴一滴攏總傳予伊
tsi̍t-tih tsi̍t-tih lóng-tsóng thuân hōo i
用阮心酸的目屎
iōng gún sim-sng ê ba̍k-sái
寫做愛你這兩字
siá tsuè ài lí tsit nn̄g-jī
阮拜託流星
gún pài-thok liû-tshinn
替阮寄予伊
thè gún kià hōo i
