望天好牽成
《望天好牽成》Bāng Thinn Hó Khan-sîng
蕭玉芬 Siau Gio̍k-hun
——————————————
希望明仔載
hi-bāng bîn-á-tsài
一帆風順好運來
it-phâng hong sūn hó-ūn lâi
一睏有美夢
tsi̍t-khùn ū bí-bāng
夢中充滿你的愛
bāng-tiong tshiong-buán lí ê ài
感謝有你走傱
kám-siā ū lí tsáu-tsông
四界奔波走天涯
sì-kè phun-pho tsáu thian-gâi
恬恬看佇眼內
tiām-tiām khuànn tī gán-lāi
暗暗咧感慨
àm-àm teh kám-khài
期待明仔載
kî-thāi bîn-á-tsài
目睭擘開你出現
ba̍k-tsiu peh-khui lí tshut-hiān
有你的雙手
ū lí ê siang-tshiú
予阮溫暖佮關懷
hōo gún un-luán kah kuan-huâi
祈求予你勇健
kî-kiû hōo-lí ióng-kiānn
毋免掛心咱厝內
m̄-bián khuà-sim lán tshù-lāi
誠心為你拜拜
sîng-sim uī lí pài-pài
平安會順序轉來
pîng-an ē sūn-sī tńg-lâi
望天好牽成
bāng thinn hó khan-sîng
不再飄飄花落盡
put-tsài phiau-phiau hue lo̍h tsīn
愛一生有你致蔭
ài it-sing ū lí tì-ìm
從此美夢望成真
tsiông-tshú bí-bāng bāng sîng tsin
為你啊有情的形影
uī lí–ah ū-tsîng ê hîng-iánn
綴你跤步牽手行
tuè lí kha-pōo khan-tshiú kiânn
無遺憾幸福得人疼
bô uî-hām hīng-hok tit-lâng-thiànn
天公保庇共阮晟
thinn-kong pó-pì kā gún tshiânn
