幸福的勇氣
《幸福的勇氣》Hīng-hok ê Ióng-khì
蕭玉芬Siau Gio̍k-hun
——————————————
阮的心內
gún ê sim-lāi
藏著一个人
tshàng tio̍h tsi̍t-ê-lâng
只是一直毋敢講出來
tsí-sī it-ti̍t m̄-kánn kóng–tshut-lâi
身邊的朋友苦勸我
sin-pinn ê pîng-iú khóo-khǹg guá
毋通繼續戇戇等
m̄-thang kè-sio̍k gōng-gōng tán
因為是我一人
in-uī sī guá tsi̍t-lâng
佇咧做眠夢
tī-leh tsuè bîn-bāng
有一工
ū tsi̍t-kang
你出現佇阮面前
lí tshut-hiān tī gún bīn-tsîng
歡喜的心情
huann-hí ê sim-tsîng
親像春天的花蕊
tshin-tshiūnn tshun-thinn ê hue-luí
應該愛把握這一切
ing-kai ài pá-ak tse it-tshè
對你表明我的心意
tuì lí piáu-bîng guá ê sim-ì
心中才袂有
sim-tiong tsiah buē ū
後悔這兩字
hiō-hué tsit nn̄g-jī
踮這个世界
tiàm tsit ê sè-kài
幸福的人
hīng-hok ê lâng
需要真大的勇氣
su-iàu tsin tuā ê ióng-khì
想欲講的話
siūnn-beh kóng ê uē
毋願閣藏心內
m̄-guān koh tshàng sim-lāi
看著你的笑容
khuànn-tio̍h lí ê tshiò-iông
彼對迷人的眼神
hit tuì bê-lâng ê gán-sîn
心中所有的愛
sim-tiong sóo-ū ê ài
想欲全部予你
siūnn-beh tsuân-pōo hōo lí
踮這个世界
tiàm tsit ê sè-kài
幸福的人
hīng-hok ê lâng
需要真大的勇氣
su-iàu tsin tuā ê ióng-khì
想欲講的話
siūnn-beh kóng ê uē
毋願閣藏心底
m̄-guān koh tshàng sim-té
想欲牽你的手
siūnn-beh khan lí ê tshiú
對你講出我愛你
tuì lí kóng-tshut guá ài lí
希望佮你做伙
hi-bāng kah lí tsò-hué
陪伴你到永遠
puê-phuānn lí kàu íng-uán
