悲哀的船隻
《悲哀的船隻》Pi-ai ê Tsûn-tsiah
陳美雪Tân Bí-suat
——————————————
無情風雨沃著阮
bô-tsîng hong-hōo ak tio̍h gún
身軀寒甲爍爍顫
sin-khu kuânn kah sih-sih-tsùn
為著欲見你的面
uī-tio̍h bueh kìnn lí ê bīn
阮是無怨恨
gún sī bô uàn-hūn
因為爸母阻止阮
in-uī pē-bú tsóo-tsí gún
毋是無情份
m̄-sī bô tsîng-hūn
毋管是紅燈青燈
m̄-kuán sī âng-ting tshinn-ting
一路走甲無歇睏
tsi̍t-lōo tsáu kah bô hioh-khùn
望你聽我來辯解
bāng lí thiann guá lâi piān-kái
無疑船已經去
bô-gî tsûn í-king khì
看著船隻漸漸去
khuànn-tio̍h tsûn-tsiah tsiām-tsiām khì
開步拚倚到岸邊
khui-pōo piànn uá kàu huānn-pinn
大聲叫你的名字
tuā-siann kiò lí ê miâ-jī
大氣喘袂離
tuā-khuì-tshuán buē-lī
到底你是無聽見
tàu-tué lí sī bô thiann–kìnn
抑是咧受氣
ia̍h-sī teh siūnn-khì
敢毋知狂風暴雨
kám m̄-tsai kông-hong-po̍k-ú
阮也走來欲送你
gún iā tsáu-lâi bueh sàng lí
只驚你會來誤會
tsí kiann lí ē lâi gōo-huē
當做無來相辭
tòng-tsuè bô lâi sio-sî
大船已經看袂清
tuā-tsûn í-king khuànn buē-tshing
大雨猶原落袂停
tuā-hōo iu-guân lo̍h buē-thîng
只有阮踮在港邊
tsí-ū gún tiàm-tsāi káng-pinn
戇戇看海水
gōng-gōng khuànn hái-tsuí
海面雨水抑珠淚
hái-bīn hōo-tsuí ia̍h tsu-luī
阮也分袂明
gún iā hun buē-bîng
再相見已經無時
tsài sio-kìnn í-king bô sî
啥人知咱的不幸
siánn-lâng tsai lán ê put-hīng
心愛的人
sim-ài ê lâng
再會啦
tsài-huē–lah
請你著愛同情
tshiánn lí tio̍h-ài tông-tsîng
