愛的風雲
《愛的風雲》Ài ê Hong-hûn
于櫻櫻Î Ing-ing
——————————————
茫茫月光照溪邊
bông-bông gue̍h-kng tsiò khe-pinn
也照著我佮你
iā tsiò tio̍h guá kah lí
看你情淚點點滴
khuànn lí tsîng-luī tiám-tiám tih
我也心稀微
guá iā sim hi-bî
因為你我的年紀
in-uī lí guá ê nî-kí
有一段距離
ū tsi̍t-tuānn kī-lī
今日爸母來阻止
kim-ji̍t pē-bú lâi tsóo-tsí
咱才愛分離
lán tsiah ài hun-lī
早日熟似彼當時
tsá-ji̍t si̍k-sāi hit-tong-sî
雙人分袂離
siang-lâng hun buē-lī
彼段純情的情誼
hit tuānn sûn-tsîng ê tsîng-gî
可比月當圓
khó-pí gue̍h tng înn
無疑愛情風波起
bô-gî ài-tsîng hong-pho khí
變成烏陰天
piàn-sîng oo-im-thinn
可憐傷心的情侶
khó-liân siong-sim ê tsîng-lī
離別在溪邊
lī-pia̍t tsāi khe-pinn
月娘照著紗窗邊
gue̍h-niû tsiò tio̍h se-thang pinn
淒涼的五更
tshe-liâng ê gōo-kinn
忽然風雲崁滿天
hut-jiân hong-hûn khàm muá-thinn
風雨落綿綿
hong-hōo lo̍h mî-mî
烏天暗地阮傷悲
oo-thinn àm-tē gún siong-pi
含淚來分開
hâm-luī lâi hun-khui
今生袂當結連理
kim-sing buē-tàng kiat-liân-lí
期待後出世
kî-thāi āu-tshut-sì
