落大雨彼一日
《落大雨彼一日》Lo̍h-tuā-hōo Hit-tsi̍t-ji̍t
鄭日清 Tēnn Ji̍t-tshing
——————————————
彼早起啊落大雨
hit tsái-khí–ah lo̍h tuā-hōo
落到彼下晡
lo̍h kah hit ē-poo
為欲等伊
uī beh tán i
害阮衫褲
hāi gún sann-khòo
沃甲澹糊糊
ak kah tâm-kôo-kôo
啊~愛情算來甘帶苦
ah~ ài-tsîng sǹg–lâi kam tài khóo
表示初戀的熱度
piáu-sī tshoo-luân ê jia̍t-tōo
算起來
sǹg–khí-lâi
也是為著幸福的前途
iā-sī uī-tio̍h hīng-hok ê tsiân-tôo
今仔日又來想起彼時
kia̋nn-ji̍t iū lâi siūnn-khí hit-sî
在落雨街路
tsāi lo̍h-hōo kue-lōo
彼早起啊落大雨
hit tsái-khí–ah lo̍h tuā-hōo
落到彼黃昏
lo̍h kah hit hông-hun
兩人講話
nn̄g-lâng kóng-uē
太過興奮
thài kuè hìng-hùn
毋驚雨大陣
m̄-kiann hōo tuā-tsūn
啊~伊講爸母毋允准
ah~ i kóng pē-bú m̄ ún-tsún
甘願看破從孝順
kam-guān khuànn-phuà tsiông hàu-sūn
講起來
kóng–khí-lâi
真是誤著寶貴的青春
tsin sī gōo tio̍h pó-kuì ê tshing-tshun
今仔日落雨想起彼時
kia̋nn-ji̍t lo̍h-hōo siūnn-khí hit-sî
心頭愈憂悶
sim-thâu jú iu-būn
彼早起啊落大雨
hit tsái-khí–ah lo̍h tuā-hōo
落到彼半暝
lo̍h kah hit puànn-mî
雨水清冷
hōo-tsuí tshing-líng
伴阮行到
phuānn gún kiânn kàu
寂靜的深更
tsi̍k-tsīng ê tshim-kinn
啊~傷心提起欲分離
ah~ siong-sim thê-khí beh hun-lī
兩人抱著目屎滴
nn̄g-lâng phō tio̍h ba̍k-sái tih
想起來
siūnn–khí-lâi
總是一項可惜的代誌
tsóng-sī tsi̍t-hāng khó-sioh ê tāi-tsì
盈暗落雨想起彼暝
îng-àm lo̍h-hōo siūnn-khí hit-mî
加添心稀微
ka-thiam sim hi-bî
