算命歌
《算命歌》Sǹg-miā Kua
鄭進一Tēnn Tsìn-it
————————–
手攑籤筒啊 有三支喔
tshiú gia̍h tshiam-tâng–ah, ū sann ki–ooh
啊欲卜欲算 隨在你
ah beh pok, beh sǹg, suî-tsāi–lí
啊欲問前途一定虛啊 哎喲喂
ah beh mn̄g tsiân-tôo it-tīng hi–ah, ai-iō-uêh
欲卜婚姻是百面離啊
beh pok hun-in sī pah-bīn lī–ah
咿~咿~咿~~ i~i~i~~
(口白)—–↓
來來來 看看看
lâi lâi lâi, khuànn khuànn khuànn
籤聖卦定 卜卦兼算命
tshiam siànn kuà tiānn, pok-kuà kiam sǹg-miā
有卜的好命 慢卜的勇健
ū-pok–ê hó-miā, bān-pok–ê ióng-kiānn
無卜的我咧àinn恁娘
bô-pok–ê guá leh àinn lín-niâ
呃我是講 無卜的放你行
eh, guá sī kóng bô-pok–ê pàng lí kiânn
有準才敢大聲
ū tsún tsiah kánn tuā-siann
無準的當做我臭彈
bô-tsún–ê tòng-tsò guá tshàu-tuānn
來啊 參考看覓 祖公十八代
lâi–ah, tsham-khó khuànn-māi, tsóo-kong tsa̍p-peh-tāi
過去佮未來 保證你無算無敗
kuè-khì kah bī-lâi, pó-tsìng lí bô sǹg bô pāi
愈算愈害 毋是 愈算愈利 哈哈
jú sǹg jú hāi, m̄-sī! jú sǹg jú lāi, há-hah
本仙鐵齒暴牙 人稱鄭半仙
pún sian thih-khí pok-gê, jîn tshing Tēnn-puàn-sian
三歲就佮鬼谷子結緣
sann huè tō kah Kuí-kok-tsú kiat-iân
唐山去過數千遍
Tn̂g-suann khì-kuè sòo-tshing-piàn
拜師學藝專門研究騙
pài-su ha̍k-gē tsuan-bûn gián-kiù phiàn
無論紫微、八字 攏是我家己編
bô-lūn tsí-bî, peh-jī, lóng-sī guá ka-kī pian
掌紋抾骨 啊! 歹勢! 掌紋摸骨
tsiáng-bûn khioh-kut, ah! pháinn-sè! tsiáng-bûn bong-kut
鐵板神數 各門各路 總是王祿仔步
thih-pán sîn-sòo, kok-mn̂g kok-lōo, tsóng-sī ông-lo̍k-á-pōo
啊若卜卦 鳥卦 錢卦 米卦
ah-nā pok-kuà, tsiáu-kuà, tsînn-kuà, bí-kuà
我毋免看 就會當算你田園有偌闊
guá m̄-bián khuànn, tō ē-tàng sǹg lí tshân-hn̂g ū guā khuah
看你事業做偌大 斷你翁某當時煞
khuànn lí sū-gia̍p tsò guā tuā, tuān lí ang-bóo tang-sî suah
點你財庫袂四散 知你幾點會著痧
tiám lí tsâi-khòo bē sì-suànn, tsai lí kuí tiám ē tio̍h-sua
助你出門去挵著車 助你來世做乞食
tsōo lí tshut-mn̂g khì lòng tio̍h tshia, tsōo lí lâi-sè tsò khit-tsia̍h
來啊 看你一命
lâi–ah, khuànn lí tsi̍t miā
不過是趁一點仔所費爾爾
put-kò sī thàn tsi̍t-tiám-á sóo-huì–niā-niā
你袂較散 我嘛袂較好額
lí bē khah sàn, guá mā bē khah hó-gia̍h
來啊 行毋知路的緊來啊
lâi–ah, kiânn-m̄-tsai-lōo–ê kín lâi–ah
(口白)—–↑
全國出名 免探聽欸
tsuân-kok tshut-miâ, bián thàm-thiann–eh
世界聞名啊 眾人驚哩
sè-kài bûn-bîng–ah, tsìng-lâng kiann–lih
有命算甲變無命
ū miā sǹg kah piàn bô miā
哎喲喂 總統算甲變乞食啊
ai-iō-uê, tsóng-thóng sǹg kah piàn khit-tsia̍h–ah
咿~咿~咿~ i~i~i~
(口白)—–↓
啊tsiooh tooh má-teh
ah! tsiooh tooh má-teh
這位少年家 小等一下
tsit uī siàu-liân-ke, sió tán–tsi̍t-ē
我看你目眉必叉 命帶桃花
guá khuànn lí ba̍k-bâi pit-tshe, miā tài-thô-hue
恭喜喔 你註定娶某佮人公家
kiong-hí–ooh, lí tsù-tiānn tshuā-bóo kah lâng kong-ke
啥物 你相雞 有翼難飛 今年閣著雞災
siánn-mih! lí siùnn ke! ū si̍t lân pue, kin-nî koh tio̍h ke-tse
子丑寅卯 辰巳午未 申酉戌亥
tsú thiú în báu, sîn sū ngóo bī, sin iú sut hāi
哎啊! 又閣七月十五 子時生
aih-ah! iū-koh tshit-gue̍h tsa̍p-gōo, tsú-sî senn
你命中帶衰註定認賊做爸 揣無娘嬭
lí miā tiong tài-sue, tsù-tiānn jīn-tsha̍t tsò-pē, tshuē-bô niû-lé
喂喂 少年的 猶未講了咧
ueh! ueh! siàu-liân–ê, iáu-buē kóng liáu–leh
這位阿伯
tsit uī a-peh
你耳珠遐大塊 一定佛祖轉世
lí hīnn-tsu hiah tuā tè, it-tīng hu̍t-tsóo tsuán-sè
某媠囝濟 袂死閣袂破病
bóo suí kiánn tsē, bē sí koh bē phuà-pēnn
哎啊放尿閣袂滴著鞋啊
aih-ah! pàng-jiō koh bē tih tio̍h ê–ah
喂阿伯我猶未講了咧
ueh! a-peh guá iáu-buē kóng liáu–leh
你死老猴咧啊 身長命短 上慢擋到年底
lí sí-lāu-kâu–leh–ah, sin tn̂g miā té, siōng bān tòng kàu nî-té
我看乎 上緊食到年節爾
guá khuànn honnh, siōng kín tsia̍h kàu nî-tseh–niā
這位小姐
tsit uī sia̋u-tsê
你喙脣若露螺 面皮若發粿
lí tshuì-tûn nā lōo-lê, bīn-phuê nā huat-kué
頭前兩葩電火
thâu-tsîng nn̄g pha tiān-hué
一爿懸一爿低 一粒翹一粒垂
tsi̍t-pîng kuân tsi̍t-pîng kē, tsi̍t-lia̍p khiàu tsi̍t-lia̍p suê
雞看拍咯雞 狗看吹狗螺
ke khuànn phah-ko̍k-ke, káu khuànn tshue-káu-lê
人看是一直詈 鬼看是起性地 神看是塗跤爬
lâng khuànn sī it-ti̍t lé, kuí khuànn sī khí-sìng-tē, sîn khuànn sī thôo-kha pê
趕緊趕緊 毋通閣延延
kuánn-kín kuánn-kín, m̄-thang koh iân-tshiân
揣本仙共你祭祭
tshuē pún-sian kā lí tsè-tsè
喂小姐小姐 人我閒閒呢
ueh! sió-tsiá! sia̋u-tsê! lâng guán îng-îng–neh
(口白)—–↑
命運好䆀 啊 天註定喔
miā-ūn hó-bái–ah, thinn tsù-tiānn–ooh
生離死別啊 各人命哩
sing lī sú piat–ah, kok-lâng miā–lih
勸咱逐家愛拍拚 哎喲喂
khǹg lán ta̍k-ke ài phah-piànn, ai-iō-uê
人生的路無白行啊
jîn-sing ê lōo bô pe̍h kiânn–ah
咿~咿~咿~ i~i~i~
