再會啦彼个小姑娘
《再會啦彼个小姑娘》Tsài-huē–lah Hit ê Sió-koo-niû
鄭日清Tēnn Ji̍t-tshing
——————————————
全無希望佮伊相會
tsuân bô hi-bāng kah i siong-huē
虛情的戀夢
hi-tsîng ê luân-bāng
想欲揣著彼个姑娘
siūnn-beh tshuē-tio̍h hit ê koo-niû
每暗來等伊
muí-àm lâi tán i
予我空空等規暝
hōo guá khang-khang tán kui-mî
等到更深時
tán-kàu kinn-tshim sî
路邊燈火
lōo-pinn ting-hué
照著阮
tsiò tio̍h gún
加添阮悲哀
ka-thiam gún pi-ai
再會啦再會啦
tsài-huē–lah tsài-huē–lah
抱著伊形影
phō tio̍h i hîng-iánn
再會啦再會啦
tsài-huē–lah tsài-huē–lah
失望回轉去
sit-bōng huê-tńg–khìr
伊有對我講起
i ū tuì guá kóng-khí
雙人永遠欲相愛
siang-lâng íng-uán bueh siong-ài
半途被人來共阻礙
puàn-tôo pī-lâng lâi kā tsóo-gāi
將咱拆分離
tsiong lán thiah hun-lî
不過我是有始終
put-koh guá sī ū sí-tsiong
深深愛著你
tshim-tshim ài-tio̍h lí
路邊草花
lōo-pinn tsháu-hue
笑著阮
tshiò tio̍h gún
痴情的男性
tshi-tsîng ê lâm-sìng
再會啦再會啦
tsài-huē–lah tsài-huē–lah
希望你將來
hi-bāng lí tsiong-lâi
再會啦再會啦
tsài-huē–lah tsài-huē–lah
幸福過日子
hīng-hok kuè ji̍t-tsí
毋願流落男性目屎
m̄-guān lâu lo̍h lâm-sìng ba̍k-sái
暗暗吞落去
àm-àm thun–lo̍h-khìr
夜雺霧的點點露水
iā bông-bū ê tiám-tiám lōo-tsuí
引阮流出來
ín gún lâu–tshut-lâi
懷念悲慘的戀夢
huâi-liām pi-tshám ê luân-bāng
見景傷心冷
kiàn-kíng siong-sim líng
看破一切像眠夢
khuànn-phuà it-tshè tshiūnn bîn-bāng
不再來想你
put-tsài lâi siūnn lí
再會啦再會啦
tsài-huē–lah tsài-huē–lah
悲情的城市
pi-tsîng ê siânn-tshī
再會啦再會啦
tsài-huē–lah tsài-huē–lah
彼个小姑娘
hit ê sió-koo-niû
