過五關
《過五關》Kuè-ngóo-kuan
蔡義德Tshuà Gī-tik
——————————————
時機䆀
sî-ki bái
錢歹趁
tsînn pháinn thàn
一仙錢
tsi̍t-sián tsînn
逼死英雄好漢
pik-sí ing-hiông hó-hàn
–
人兩跤
lâng nn̄g-kha
錢四跤
tsînn sì-kha
趁少用濟
thàn tsió iōng tsuē
啥人會了解
siánn-lâng ē liáu-kái
一年又一年
tsi̍t-nî iū tsi̍t-nî
一關又一關
tsi̍t-kuan iū tsi̍t-kuan
親像拚命
tshin-tshiūnn piànn-miā
咧過五關
teh kuè ngóo-kuan
透早起床
thàu-tsá khí-tshn̂g
茶米油鹽
tê bí iû iâm
水電生活費
tsuí-tiān sing-ua̍h-huì
攏愛攢
lóng ài tshuân
大大細細項
tuā-tuā-sè-sè hāng
付袂完
hù buē-uân
哪有能力
ná-ū lîng-li̍k
變大老闆
piàn tuā-láu-pán
啊~有夠忝
ah~ ū-kàu thiám
閣袂當閃
koh buē-tàng siám
這款的人生
tsit khuán ê jîn-sing
何時幸福到站
hô-sî hīng-hok kàu-tsām
